മധ്യപ്രദേശില്‍ ബലാത്സംഗത്തിനിരയായ പെണ്‍കുട്ടി ചോരയൊലിപ്പിച്ച് വീടുകളുടെ വാതിലില്‍ മുട്ടി സഹായം അഭ്യര്‍ത്ഥിച്ചിട്ടും ആട്ടിപ്പായിച്ച് നാട്ടുകാര്‍. മധ്യപ്രദേശിലെ ഉജ്ജയിനിയിലാണ് 12 വയസുള്ള പെണ്‍കുട്ടി സഹായത്തിനായി വീടുകളുടെ വാതിലില്‍ മുട്ടിയത്. എന്നാല്‍ പെണ്‍കുട്ടിയെ സഹായിക്കാന്‍ നാട്ടുകാര്‍ തയ്യാറായില്ല. ഉജ്ജയിനിയില്‍ നിന്ന് 15 കിലോമീറ്റര്‍ അകലെയുള്ള ബാദ്‌നഗര്‍ റോഡിലാണ് സംഭവം നടന്നത്.
പെണ്‍കുട്ടി അര്‍ദ്ധ നഗ്നയായി ചോരയൊലിപ്പിച്ച് ഓരോ വീടുകളുടെയും വാതിലില്‍ മുട്ടുന്ന ദൃശ്യങ്ങള്‍ പുറത്ത് വന്നിരുന്നു. ബാദ്‌നഗര്‍ റോഡിലെ സിസിടിവി ദൃശ്യങ്ങളാണ് പുറത്ത് വന്നതോടെയാണ് വാര്‍ത്ത പുറംലോകം അറിയുന്നത്. തെരുവുകളിലൂടെ അവശയായി അലഞ്ഞ പെണ്‍കുട്ടിയെ സഹായിക്കാന്‍ ആരും എത്തിയില്ല.
തുടര്‍ന്ന് പെണ്‍കുട്ടി പ്രദേശത്തുള്ള ഒരു ആശ്രമത്തിലെത്തി സഹായം അഭ്യര്‍ത്ഥിച്ചു. ആശ്രമത്തിലെ പൂജാരി പെണ്‍കുട്ടിയ്ക്ക് വസ്ത്രം നല്‍കിയ ശേഷം ആശുപത്രിയിലെത്തിക്കുകയായിരുന്നു. തുടര്‍ന്ന് നടത്തിയ പരിശോധനയില്‍ പെണ്‍കുട്ടി ക്രൂര പീഡനത്തിന് ഇരയായതായി കണ്ടെത്തി. പരിക്കുകള്‍ ഗുരുതരമായതിനാല്‍ പെണ്‍കുട്ടിയെ ഇന്‍ഡോറിലെ ആശുപത്രിയിലേക്ക് മാറ്റിയിട്ടുണ്ട്. കുട്ടിയ്ക്ക് രക്തം ആവശ്യമായി വന്നപ്പോള്‍ പൊലീസ് ഉദ്യോഗസ്ഥനാണ് രക്തം നല്‍കിയതെന്നും പെണ്‍കുട്ടിയുടെ ആരോഗ്യ നിലയില്‍ പുരോഗതിയുണ്ടെന്നും പൊലീസ് അറിയിച്ചു.
സംഭവത്തില്‍ പ്രത്യേക അന്വേഷണ സംഘം രൂപീകരിച്ചിട്ടുണ്ടെന്നും പ്രതിയ്ക്കായി തിരച്ചില്‍ തുടരുന്നുവെന്നും ഉജ്ജയിനി ജില്ലാ പൊലീസ് മേധാവി സച്ചിന്‍ ശര്‍മ്മ മാധ്യമങ്ങളോട് പറഞ്ഞു. എന്നാല്‍ കുട്ടിയില്‍ നിന്ന് കൃത്യമായി വിവരങ്ങള്‍ ശേഖരിക്കാന്‍ പൊലീസിന് ഇതുവരെ സാധിച്ചിട്ടില്ല.
പേരും വിലാസവും ഉള്‍പ്പെടെയടുള്ള വിവരങ്ങള്‍ അന്വേഷിച്ചെങ്കിലും കുട്ടിയ്ക്ക് വ്യക്തമായി ഉത്തരം നല്‍കാന്‍ സാധിക്കുന്നില്ലെന്നാണ് പൊലീസ് പറയുന്നത്.
Read more
എന്നാല്‍ കുട്ടിയുടെ സംസാരശൈലി ഉത്തര്‍പ്രദേശിലെ പ്രയാഗ് രാജിലേതാണെന്ന് പൊലീസ് അനുമാനിക്കുന്നു. മധ്യപ്രദേശില്‍ സമീപകാലത്തായി നിരന്തരം ഉണ്ടാകുന്ന ക്രമസമാധാന പ്രശ്‌നങ്ങള്‍ പൊലീസിനും സര്‍ക്കാരിനും എതിരെയുള്ള ജനരോഷത്തിന് കാരണമാകുന്നുണ്ട്.
