ഭൂമി കുംഭകോണക്കേസിൽ ഝാര്‍ഖണ്ഡ് മുന്‍ മുഖ്യമന്ത്രി ഹേമന്ത് സോറന്റെ ഇടക്കാല ജാമ്യാപേക്ഷ സുപ്രീം കോടതി നാളെ പരിഗണിക്കും. നിലവിൽ ജുഡീഷ്യല്‍ കസ്റ്റഡിയിലാണ് ഹേമന്ത് സോറൻ. തിരഞ്ഞെടുപ്പ് പ്രചാരണത്തിനായി ഇടക്കാല ജാമ്യം നല്‍കണമെന്നാണ് ഹേമന്ത് സോറൻ ഹർജിയിൽ ആവശ്യപ്പെട്ടിരിക്കുന്നത്.
ഇഡി അഭിഭാഷകന്റെ വാദം കേള്‍ക്കുന്നതിന് വേണ്ടിയാണ് ഹര്‍ജി നാളത്തേക്ക് മാറ്റിയത്. അതേസമയം കേസില്‍ ഹേമന്ത് സോറന് ഇടക്കാല ജാമ്യം നല്‍കരുതെന്നാണ് സുപ്രീം കോടതിയില്‍ ഇഡി നല്‍കിയ സത്യവാങ്മൂലം. അന്വേഷണ ഉദ്യോഗസ്ഥരെ വ്യാജ കേസില്‍ കുടുക്കാന്‍ ഹേമന്ത് സോറന് ശ്രമിച്ചുവെന്നാണ് ഇഡിയുടെ ആരോപണം.
ജനുവരി 31നാണ് ഹേമന്ത് സോറൻ അറസ്റ്റിലാകുന്നത്. ഭൂമി കുംഭകോണവുമായി ബന്ധപ്പെട്ട കേസിൽ ഇഡി ഹേമന്ത് സോറനെ അറസ്റ്റ് ചെയ്യുകയായിരുന്നു. കള്ളപ്പണം വെളുപ്പിക്കല്‍ നിരോധന നിയമപ്രകാരമായിരുന്നു സോറന്റെ അറസ്റ്റ്. പ്രതിരോധ ഭൂമി ഇടപാട്, കല്‍ക്കരി ഖനന ഇടപാട് എന്നീ കേസുകളിലാണ് സോറനെതിരെ ഇഡി കേസ് എടുത്തിരിക്കുന്നത്.
