പാർക്കിൽ യുവതിയോട് അപമര്യാദയായി പെരുമാറിയെന്നാരോപിച്ച് യുവാവിനെ ക്രൂരമായി മര്‍ദിച്ച ശേഷം നഗ്നനാക്കി നടത്തി.തിരക്കേറിയ ജംഗ്ഷനില്‍ ആളുകള്‍ നോക്കിനില്‍ക്കെയായിരുന്നു സംഭവം. ഹസൻ ജില്ലയിലെ മഹാരാജ പാർക്കിലാണ് സംഭവം. വിജയപുര ജില്ലയിൽ നിന്നുള്ള മേഘ്‌രാജ് എന്നയാള്‍ക്കാണ് മര്‍ദനമേറ്റതെന്ന് പൊലീസ് പറഞ്ഞു.
പാർക്കിൽ അലഞ്ഞുതിരിയുന്നതിനിടെയാണ് മേഘ്‌രാജ് പെൺകുട്ടിയെ ശല്യം ചെയ്യുന്നത് നാട്ടുകാരുടെ ശ്രദ്ധയില്‍പ്പെടുന്നത്. തുടർന്ന് ഒരു സംഘം ആളുകൾ ഇയാളെ കയ്യേറ്റം ചെയ്യുകയായിരുന്നു.അടിച്ച ശേഷം തിരക്കേറിയ ട്രാഫിക് ജംഗ്ഷനായ ഹേമാവതി സ്റ്റാച്യു സർക്കിളിന് സമീപം നഗ്നനാക്കി നടത്തുകയും ചെയ്തു.
സ്ഥലത്തെത്തിയ പൊലീസ് മേഘ്‍രാജിനെ കസ്റ്റഡിയിലെടുത്തു. സംഭവത്തെ കുറിച്ച് അന്വേഷിച്ചതിന് ശേഷം ഹാസൻ സിറ്റി പൊലീസ് അജ്ഞാതരായ നാല് പേർക്കെതിരെ എഫ്‌.ഐ.ആർ രജിസ്റ്റർ ചെയ്തു. എന്നാല്‍ യുവതി മേഘ്‍രാജിനെ പരാതി നല്‍കിയിട്ടില്ലെന്നാണ് വിവരം.