ഗുജറാത്തില്‍ ഉള്ളി അരിയാന്‍ ആവശ്യപ്പെട്ടതിനെ തുടര്‍ന്നുള്ള തര്‍ക്കത്തിനൊടുവില്‍ ഒപ്പം താമസിക്കുന്നയാളെ കല്ലുകൊണ്ട് ഇടിച്ച് കൊലപ്പെടുത്തിയ യുവാവ് അറസ്റ്റില്‍. ഗുജറാത്തിലെ സൂറത്തിലാണ് പുതുവത്സര ദിനത്തില്‍ സംഭവം നടന്നത്. ഉത്തര്‍പ്രദേശ് സ്വദേശിയായ രാജു ചൗഹാനാണ് കേസില്‍ അറസ്റ്റിലായത്.
സൂറത്തിലെ തുണിമില്‍ തൊഴിലാളിയായ ജിയൂത്ത് രാജ്ഭാറാണ് കൊല്ലപ്പെട്ടത്. ഇരുവരും തുണിമില്ലിനോട് ചേര്‍ന്ന മുറിയിലാണ് താമസിച്ചിരുന്നത്. അത്താഴത്തിനിടെ കൊല്ലപ്പെട്ട രാജ്ഭാര്‍ പ്രതിയോട് ഉള്ളി അരിയാന്‍ ആവശ്യപ്പെട്ടു. ഇതില്‍ പ്രകോപിതനായ രാജു ചൗഹാന്‍ രാജ്ഭാറുമായി തര്‍ക്കത്തിലേര്‍പ്പെട്ടു.
ഇതേ തുടര്‍ന്ന് പ്രതി കല്ലുകൊണ്ടടിച്ച് രാജ്ഭാറിനെ കൊലപ്പെടുത്തിയെന്നാണ് പൊലീസ് പറയുന്നത്. കൃത്യത്തിന് ശേഷം സുഹൃത്തിന്റെ ബൈക്ക് കൈക്കലാക്കിയ പ്രതി സംഭവസ്ഥലത്ത് നിന്ന് രക്ഷപ്പെട്ടു. തുടര്‍ന്ന് റെയില്‍വേ സ്റ്റേഷനില്‍ ബൈക്ക് ഉപേക്ഷിച്ച് ഇയാള്‍ ബുസ്വാളിലേക്കുള്ള ട്രെയിന്‍ കയറി.
ഈ സമയം പ്രതിയ്ക്കായി അന്വേഷണം ആരംഭിച്ച പൊലീസ് ഇയാള്‍ ട്രെയിനില്‍ യാത്ര തിരിച്ചതായി കണ്ടെത്തുകയായിരുന്നു. ഇതേ തുടര്‍ന്ന് ഗുജറാത്ത് പൊലീസ് ആര്‍പിഎഫിന് പ്രതിയുടെ വിവരങ്ങള്‍ കൈമാറി. പിന്നാലെ നടത്തിയ അന്വേഷണത്തില്‍ പ്രതിയെ മുംബൈയില്‍ നിന്ന് പൊലീസ് കസ്റ്റഡിയിലെടുത്തു.