തിരുവണ്ണാമലയിൽ ഉരുൾപൊട്ടലുണ്ടായ സ്ഥലത്ത് നിന്ന് നാല് മൃതദേഹങ്ങൾ കണ്ടെടുത്തു. പാറകളുടെ ശക്തിയും വലിപ്പവും കാരണം രക്ഷാപ്രവർത്തനത്തിന് സമയമെടുക്കുന്നതായി രക്ഷാപ്രവർത്തകർ പറയുന്നു. ഫെംഗൽ ചുഴലിക്കാറ്റിനെ തുടർന്നുണ്ടായ കനത്ത മഴയിൽ ഒരു കുടുംബത്തിലെ ഏഴ് പേർ മണ്ണിടിച്ചിലിൽ കുടുങ്ങിയതായി റിപോർട്ടുകൾ സൂചിപ്പിക്കുന്നു. 20 മണിക്കൂറിലേറെയായി രക്ഷാപ്രവർത്തനം തുടരുകയാണ്.
ദേശീയ ദുരന്ത നിവാരണ സേന (എൻഡിആർഎഫ്), കമാൻഡോകൾ, തമിഴ്‌നാട് ഫയർ ആൻഡ് റെസ്ക്യൂ സർവീസസ് എന്നിവരുൾപ്പെടെ 170 പേർ ഈ ഓപ്പറേഷനിൽ നിലവിൽ പങ്കെടുക്കുന്നു. മാധ്യമങ്ങളോട് സംസാരിച്ച റെസ്ക്യൂ ഓഫീസർ എ. സുവിക്കൈൻ രാജ് പറയുന്നു: “ഇവിടെ ധാരാളം വലിയ കല്ലുകൾ ഉണ്ട്. ഇത് സ്കാനിംഗ് മെഷീനുകൾക്ക് കണ്ടെത്താൻ പ്രയാസമാണ്. കുടുങ്ങിക്കിടക്കുന്ന വ്യക്തികളെ രക്ഷിക്കാൻ ഞങ്ങൾ മനുഷ്യശക്തിയെയാണ് ആശ്രയിക്കുന്നത്. ആദ്യം കല്ലുകൾ നീക്കം ചെയ്യുക എന്നതാണ് ഞങ്ങളുടെ മുൻഗണന. അവശിഷ്ടങ്ങൾ നീക്കം ചെയ്യാൻ സംഘം നിലവിൽ ക്രോബാറുകൾ, പിക്കാക്സുകൾ തുടങ്ങിയ ലളിതമായ ഉപകരണങ്ങൾ ഉപയോഗിക്കുന്നു.
“ഞങ്ങൾ ജെസിബികളും എക്‌സ്‌കവേറ്ററുകളും കൊണ്ടുവരാൻ ശ്രമിക്കുന്നു. പക്ഷേ കനത്ത കല്ലുകൾ യന്ത്രങ്ങൾ പ്രവർത്തിപ്പിക്കുന്നത് വെല്ലുവിളിയാക്കുന്നു.” ഔദ്യോഗിക വൃത്തങ്ങൾ വിശദീകരിച്ചു. രക്ഷാപ്രവർത്തനങ്ങൾക്ക് മേൽനോട്ടം വഹിക്കാനും സാധ്യമായ എല്ലാ സഹായവും ഉറപ്പാക്കാനും മന്ത്രി ഇ വി വേലു, കലക്ടർ ബാസ്‌കര പാണ്ഡ്യൻ, മറ്റ് മുതിർന്ന ഉദ്യോഗസ്ഥർ എന്നിവർ സ്ഥലം സന്ദർശിച്ചു
