ശീതളപാനീയം എന്നു കരുതി മുത്തച്ഛന്‍ വാങ്ങിവെച്ച മദ്യം കുടിച്ച നാലുവയസ്സുകാരന്‍ മരിച്ചു. തുടര്‍ന്ന് കൊച്ചുമകന്‍ ഗുരുതരാവസ്ഥയിലാണെന്ന് അറിഞ്ഞ മുത്തച്ഛനും ഹൃദയാഘാതത്തെ തുടര്‍ന്ന് മരിച്ചു. ചെന്നൈ വെല്ലൂരിലെ കാട്പാടിയിലാണ് സംഭവം. കൂലിപ്പണിക്കാരനായ ചിന്നസ്വാമി (62) വൈകുന്നേരങ്ങളില്‍ മദ്യപിക്കുന്ന പതിവുണ്ടായിരുന്നു.
കഴിഞ്ഞ ദിവസം ചിന്നസ്വാമി മദ്യപിച്ച ശേഷം അടുത്ത മുറിയില്‍ ടെലിവിഷന്‍ കാണുകയായിരുന്നു. മാതാപിതാക്കള്‍ വീട്ടിലില്ലാത്ത സമയത്ത് ചിന്നസാമിയുടെ മകളുടെ മകന്‍ നാലുവയസുകാരനായ രുദ്രേഷ് മദ്യം അകത്താക്കിയത്. ശീതളപാനീയമെന്ന് കരുതിയാണ് കുട്ടി മദ്യം കഴിച്ചത്. ശ്വാസതടസം അനുഭവപ്പെട്ട് കുട്ടി കുഴഞ്ഞു വീഴുകയായിരുന്നു.
ശ്വാസമെടുക്കാന്‍ പ്രയാസപ്പെട്ട് കുട്ടി ശബ്ദമുണ്ടാക്കുന്നത് കേട്ടെത്തിയ ചിന്നസാമിയാണ് മകളെയും നാട്ടുകാരെയും വിവരമറിയിച്ചത്. മദ്യം കഴിച്ചതാണ് കാരണമെന്നറിഞ്ഞതോടെ പ്രദേശവാസികള്‍ ചിന്നസാമിയെ കുറ്റപ്പെടുത്തി. ഇതോടെ ഹൃദ്രോഗിയായ ചിന്നസാമി കുഴഞ്ഞുവീഴുകയായിരുന്നു.