സനാതന ധർമ്മ പരാമർശത്തിൽ തന്റെ തലവെട്ടിയാൽ പാതിതോഷികം പ്രഖ്യാപിച്ച സന്യാസിക്ക് മറുപടിയുമായി തമിഴ്നാട് മന്ത്രി ഉദയനിധി സ്റ്റാലിൻ. പത്തു കോടി വേണ്ട പത്തു രൂപയുടെ ചീപ്പ് മതിയാകും എന്നാണ് ഉദയനിധിയുടെ മറുപടി. എന്റെ തല ചീകാൻ 10 രൂപയുടെ ചീപ്പ് മതി,” ഭീഷണിയെ നിസാരവത്കരിച്ചുകൊണ്ട് അദ്ദേഹം പറഞ്ഞു. ചെന്നൈയിൽ ഒരു പരിപാടിയിൽ പങ്കെടുത്ത് സംസാരിക്കവെയായിരുന്നു ഇക്കാര്യം പരാമർശിച്ചത്.
തമിഴിൽ ചോപ്പ് അല്ലെങ്കിൽ സ്ലൈസ് എന്ന വാക്കിന് മുടി ചീകുക എന്നും അർത്ഥമുണ്ട്.”ഇതൊന്നും ഞങ്ങൾക്ക് പുതുമയുള്ള കാര്യമല്ല. ഈ ഭീഷണികളെയെല്ലാം ഭയക്കുന്നവരല്ല ഞങ്ങൾ. തമിഴിന് വേണ്ടി റെയിൽ ട്രാക്കിൽ തല വെച്ച കലാകാരന്റെ ചെറുമകനാണ് ഞാൻ,” മുഖ്യമന്ത്രിയുടെ മകനായ സ്റ്റാലിൻ പറഞ്ഞു.
സനാധാനമ ധർമ്മ പരാമർശവുമായി ബന്ധപ്പെട്ട് ബിജെപിയും , തീവ്ര ഹിന്ദു സംഘടനകളും ഉദയനിധിക്കെതിരെ പ്രതിഷേധം ഉയർത്തിയിരുന്നു.ഉദയനിധി സ്റ്റാലിന്റെ തല വെട്ടുന്നവർക്ക് 10 കോടി പരിതോഷികം നൽകുമെന്ന് അയോദ്ധ്യയിലെ സന്യാസി ജഗദ്ഗുരു പരമഹംസ ആചാര്യ പ്രഖ്യാപിച്ചിരുന്നു. പ്രതീകാത്മകമായി മന്ത്രിയുടെ ചിത്രം വെട്ടുന്ന വീഡിയോയും പങ്കുവെച്ചു.
കഴിഞ്ഞ ശനിയാഴ്ച ചെന്നൈയിൽ വച്ച് ഒരു പ്രസംഗത്തിനിടെ നടത്തിയ പരാമർശമാണ് ഉദയനിധിയെ വിവാദത്തിലാക്കിയത്. “ചില കാര്യങ്ങൾ എതിർക്കാനാവില്ല. അതിനെ ഉന്മൂലനം ചെയ്യണം. നമുക്ക് ഡെങ്കിപ്പനി, മലേറിയ, കോവിഡ് എന്നിവയെ എതിർക്കാനാവില്ല. നിർമാർജനം ചെയ്യാനേ കഴിയൂ. അങ്ങനെ തന്നെയാണ് സനാതനവും. അതിനെ എതിർക്കുന്നതിൽ ഉപരിയായി നിര്‍മാർജനം ചെയ്യുകയാണ് വേണ്ടതെന്നായിരുന്നു ഉദയനിധിയുടെ വാക്കുകൾ.
ജാതിവെറിക്ക് ഇരയായ രോഹിത് വെമുലയുടെ അമ്മയെ ഉള്‍പ്പെടെ ഉദയനിധി പ്രസംഗിച്ച വേദിയിൽ ഉണ്ടായിരുന്നു. പരാമർശം വാർത്തയായതോടെ ബിജെപി അത് വിവാദമാക്കി. ഉയനിധി സ്റ്റാലിന്റെ പരാമര്‍ശം സാമുദായിക സംഘര്‍ഷവും മതസ്പര്‍ധയും ലക്ഷ്യം വച്ചെന്ന ആരോപണമാണ് ബിജെപിയും തീവ്രഹിന്ദുത്വ സംഘടനകളും ഉയർത്തുന്നത്. പരാമർശത്തിൽ, മന്ത്രി ഉദയനിധിസ്റ്റാലിനെ പ്രോസിക്യൂട്ട് ചെയ്യാൻ അനുമതി തേടി ബിജെപി ഗവര്‍ണറെ സമീപിച്ചു.