മഹാത്മ ഗാന്ധിയുടെ ചിത്രത്തിന് പകരം ഇന്ത്യന്‍ കറന്‍സിയില്‍ ഹിന്ദുമഹാസഭാ സ്ഥാപകന്‍ വിനായക് സവര്‍ക്കറുടെ ചിത്രമാണ് വേണ്ടതെന്ന് ഹിന്ദുസഭ. സവര്‍ക്കര്‍ക്ക് ഭാരതരത്ന കൊടുക്കണമെന്നും ഭാരവാഹികള്‍ ആവശ്യപ്പെട്ടു. ഉപാധ്യക്ഷന്‍ അശോക് ശര്‍മ്മ, അഭിഷേക് അഗര്‍വാള്‍ എന്നിവരാണ് ഈ ആവശ്യം ഉന്നയിച്ച് രംഗത്തു വന്നിരിക്കുന്നത്. സവര്‍ക്കറുടെ ജന്മവാര്‍ഷികത്തോട് അനുബന്ധിച്ചാണ് ഹിന്ദുമഹാസഭ ഇങ്ങനെ ഒരാവശ്യം ഉന്നയിച്ചത്. നേരത്തെ വാര്‍ഷികത്തോടനുബന്ധിച്ച് പത്താം ക്ലാസിലേയും പതിനൊന്നാം ക്ലാസിലേയും വിദ്യാര്‍ത്ഥികള്‍ക്ക് കത്തി സമ്മാനിച്ചിരുന്നു, ഈ സംഘടന. ഹിന്ദുക്കളെ സ്വയം രക്ഷിക്കാന്‍ പ്രാപ്തമാക്കുന്നതിനാണ് കത്തി എന്നായിരുന്നു വിശദീകരണം.
രാജ്യത്തിനു വേണ്ടി സവര്‍ക്കര്‍ നടത്തിയ ത്യാഗങ്ങള്‍ കണ്ടില്ലെന്ന് നടിക്കാനാകില്ലെന്ന് ഹിന്ദുമഹാസഭാ നേതാക്കള്‍ പറഞ്ഞു.
Read more
മുമ്പ് പ്രധാനമന്ത്രി നരേന്ദ്ര മോദിയും സവര്‍ക്കറെ പ്രശംസിച്ച് രംഗത്തെത്തിയിരുന്നു. ശക്തമായ ഇന്ത്യയുടെ അടയാളമാണ് സവര്‍ക്കറെന്നും അദ്ദേഹം രാജ്യത്തിന് വേണ്ടി ഒരുപാട് പ്രവര്‍ത്തനങ്ങള്‍ നടത്തിയിട്ടുണ്ടെന്നും മോദി പറഞ്ഞു. ഹിന്ദുക്കളുടെ ശാക്തീകരണമാണ് സവര്‍ക്കറുടെ സ്വപനമെന്ന് ഹിന്ദുമഹാസഭ വ്യക്തമാക്കി. സ്വയരക്ഷയ്ക്കും രാജ്യരക്ഷയ്ക്കും വേണ്ടി ഹിന്ദുക്കളെ പ്രാപ്തരാക്കാനാണ് കുട്ടികള്‍ക്ക് ആയുധങ്ങള്‍ സമ്മാനിച്ചതെന്ന് ഹിന്ദുമഹാസഭ ദേശീയ സെക്രട്ടറി പൂജ ശകുന്‍ പാണ്ഡെ പറഞ്ഞിരുന്നു.
