മുഖത്തുള്ളത് താടിയാണോ അതോ മാസ്‌കോ; സുരേഷ് ഗോപിയുടെ പുതിയ ലുക്കിനെ പറ്റി രാജ്യസഭയിലും ചര്‍ച്ച
അടുത്തിടെ എംപിയും സിനിമാനടനുമായ സുരേഷ് ഗോപിയുടെ രാജ്യസഭയിലെ ഒരു പ്രസംഗത്തിന്റെ വീഡിയോ വൈറലായിരുന്നു. ആദിവാസികള്‍ക്കായി രാജ്യസഭയില്‍ ഉഗ്രന്‍ പ്രസംഗം അവതരിപ്പിച്ച വീഡിയോയാണ് വ്യാപകമായി പ്രചരിച്ചത്. അതിന് പിന്നാലെ ഇപ്പോള്‍ രാജ്യസഭയില്‍ നിന്നുള്ള മറ്റൊരു സംഭവം കൂടി സാമൂഹ്യ മാധ്യമങ്ങളില്‍ ശ്രദ്ധ നേടുകയാണ്.
സുരേഷ് ഗോപിയുടെ പുതിയ ലുക്കിനെ കുറിച്ചുള്ള ചര്‍ച്ചയാണ് വീഡിയോയില്‍ കാണാന്‍ കഴിയുന്നത്. അദ്ദേഹത്തിന്റെ പുതിയ ലുക്ക് കണ്ടപ്പോള്‍ സഭയുടെ അദ്ധ്യക്ഷനും ഉപരാഷ്ട്രപതിയും കൂടിയായ വെങ്കയ്യ നായിഡുവിന് ഒരു സംശയം തോന്നി. ഈ സംശയമാണ് ചര്‍ച്ചയ്ക്ക് കാരണമായത്. സുരേഷ് ഗോപിയുടെ മുഖത്തുള്ളത് താടിയാണോ അതോ മാസ്‌ക് ആണോ എന്നായിരുന്നു ഉപരാഷ്ട്രപതിയുടെ സംശയം.
അദ്ദേഹം ഇത് നേരിട്ട് സുരേഷ് ഗോപിയോട് തന്നെ ചോദിക്കുകയും ചെയ്തു. ഈ ചോദ്യം സഭിയില്‍ ആകെ ചിരി പടര്‍ത്തി. ശേഷം ഇത് താടി തന്നെയാണെന്നും, തന്റെ അടുത്ത സിനിമയ്ക്കു വേണ്ടിയുള്ള പുതിയ ലുക്കാണെന്നും സുരേഷ് ഗോപി മറുപടിയും നല്‍കി.