ഇസ്രയേൽ തങ്ങളുടെ ആക്രമണം നിർത്തിയാൽ മുഴുവൻ വ്യവസ്ഥകളും അംഗീകരിച്ചുകൊണ്ടുള്ള കരാറിന് തയ്യാറെന്ന് ഹമാസ്. ഈ വിവരം മധ്യസ്ഥ ചർച്ചയ്ക്ക് മുൻകൈയെടുക്കുന്നവരെ അറിയിച്ചിട്ടുണ്ടെന്ന് ഹമാസ് വ്യക്തമാക്കി. ഇസ്രയേൽ ഇപ്പോഴും ആക്രമണം തുടരുന്ന സാഹചര്യത്തിൽ കൂടുതൽ മധ്യസ്ഥ ചർച്ചകൾക്ക് തയ്യാറല്ലെന്നും ഹമാസ് പുറത്തുവിട്ട പ്രസ്താവനയിൽ പറയുന്നു.
ഈജിപ്‌തും ഖത്തറും തമ്മിൽ നടന്ന മധ്യസ്ഥ ചർച്ചകൾക്കിടെയാണ് ഹമാസ് തങ്ങളുടെ നിലപാട് വ്യക്തമാക്കിയത്. ഇസ്രയേൽ യുദ്ധം നിർത്തിയാൽ ബന്ദികളേയും തടവുകാരേയും പരസ്‌പരം കൈമാറുന്നതടക്കമുള്ള മുഴുവൻ വ്യവസ്ഥകളും അംഗീകരിച്ചുകൊണ്ടുള്ള കരാറിന് തങ്ങൾ തയ്യാറാണെന്നും ഹമാസ് വ്യക്തമാക്കി. ഹമാസിലെ ജനങ്ങൾ ആക്രമണം, ഉപരോധം, പട്ടിണി, വംശഹത്യ എന്നിവയിലൂടെയാണ് കടന്നുപോകുന്നത്. ഇസ്രയേൽ ഇപ്പോഴും വെടിനിർത്തലിന് തയ്യാറായിട്ടില്ല എന്നും ഇത്തരമൊരു സാഹചര്യത്തിൽ ഇപ്പോൾ നടക്കുന്ന മധ്യസ്ഥ ചർച്ചകളിൽ സഹകരിക്കാൻ ഹമാസും പലസ്തീനിലെ മറ്റ് സംഘടനകളും തയ്യാറല്ലെന്നും ഹമാസ് പ്രസ്താവനയിൽ പറഞ്ഞു.
നേരത്തെ യുദ്ധം അവസാനിപ്പിക്കുന്നതുമായി ബന്ധപ്പെട്ട് ഹമാസ് നേരത്തേ മുന്നോട്ടുവെച്ച വ്യവസ്ഥകൾ അംഗീകരിക്കാൻ സാധിക്കില്ലെന്ന് ഇസ്രയേൽ നിലപാട് എടുത്തിരുന്നു. ഇസ്രയേൽ നശിപ്പിക്കാൻ ഇറങ്ങിത്തിരിച്ച തീവ്രവാദി സംഘത്തെ ഉന്മൂലനം ചെയ്യുമെന്നായിരുന്നു ഇസ്രയേൽ അന്ന് പറഞ്ഞത്. അതേസമയം, തങ്ങൾ റാഫ ആക്രമിച്ചത് ബന്ദികളേയും തടവുകാരേയും മോചിപ്പിക്കാനും ഹമാസ് തീവ്രവാദികളെ വധിക്കാനും ലക്ഷ്യംവെച്ചാണെന്ന് ഇസ്രയേൽ പറഞ്ഞു.
ഏഴു മാസമായി തുടരുന്ന ഇസ്രയേൽ-ഹമാസ് യുദ്ധം അവസാനിപ്പിക്കാനുള്ള ലോകരാജ്യങ്ങളുടെ ഇടപെടൽ കാര്യക്ഷമമായി തുടരുകയാണ്. എന്നാൽ ഇരുരാജ്യങ്ങളും പരസ്‌പരം പഴിചാരുന്നതുമൂലം സമാധാന ചർച്ചകൾ എവിടെയും എത്താതെ പോകുകയാണ്. ഈ സാഹചര്യത്തിലാണ് വ്യവസ്ഥകൾ അംഗീകരിക്കുന്നത് സംബന്ധിച്ച് നിലപാട് വ്യക്തമാക്കിയിരിക്കുന്നത്. അന്താരാഷ്ട്ര നീതിന്യായ കോടതിയുടെ വെടിനിർത്തൽ നിർദേശം ലംഘിച്ച് ഇസ്രയേൽ, ഗാസയിലെ നഗരമായ റാഫയിലേക്ക് ആക്രമണം വ്യാപിപ്പിക്കുന്ന സാഹചര്യത്തിലാണ് ഹമാസിൻ്റെ പുതിയ വെളിപ്പെടുത്തൽ. പലസ്തീൻ ആരോഗ്യവകുപ്പ് കഴിഞ്ഞ ദിവസം പുറത്തുവിട്ട കണക്കുകൾ പ്രകാരം ഗാസയിൽ ഇസ്രയേൽ നടത്തിയ ആക്രമണത്തിൽ 36,000 പേർക്കാണ് ജീവൻ നഷ്ടമായത്.