ചെങ്കടലില്‍ ഹൂതിവിമതരുടെ ആക്രമണത്തിനിരയായ ഗ്രീക്ക് എണ്ണടാങ്കറില്‍നിന്നുള്ള ചോര്‍ച്ച ശക്തമായി. എണ്ണയുടെ ചോര്‍ച്ച തടയാന്‍ സാധിക്കാത്തതോടെ വന്‍ പരിസ്ഥിതി നാശത്തിനിടയാക്കുമെന്നു യുഎസ് പ്രതിരോധവകുപ്പ് മുന്നറിയിപ്പു നല്‍കി.
ഒരാഴ്ച മുന്പ് ആക്രമണം നേരിട്ട എംവി സുനിയോണ്‍ എന്ന കപ്പലിലെ തീ ഇതുവരെ അണഞ്ഞിട്ടില്ല. കപ്പലിനെ കെട്ടിവലിച്ച് കൊണ്ടുപോകാന്‍ രണ്ടു ടഗ് ബോട്ടുകള്‍ അയച്ചെങ്കിലും ഹൂതികളുടെ ആക്രമണം മൂലം നടന്നില്ലെന്നു യുഎസ് വ്യക്തമാക്കി.
ഒന്നരലക്ഷം ടണ്‍ (പത്തു ലക്ഷം വീപ്പ) ക്രൂഡ് ആണ് കപ്പലിലുള്ളത്. കഴിഞ്ഞ ബുധനാഴ്ചയാണു ഹൂതികള്‍ ഈ കപ്പല്‍ ആക്രമിച്ചത്. പലസ്തീന് ഐക്യദാര്‍ഢ്യം പ്രഖ്യാപിച്ചാണു കപ്പലുകള്‍ ആക്രമിക്കുന്നതെന്നാണ് ഹൂതികള്‍ പറയുന്നത്.
കഴിഞ്ഞ ദിവസം, യെമനു സമീപം ചരക്കുകപ്പലുകള്‍ ഹൂതികള്‍ ആക്രമിച്ചിരുന്നു. പാനമയില്‍ രജിസ്റ്റര്‍ ചെയ്ത എസ്ഡബ്ല്യു നോര്‍ത്ത് വിന്‍ഡ് വണ്‍ കപ്പലുകളാണ് ആക്രമിക്കപ്പെട്ടത്. ഇതില്‍ ഗ്രീക്ക് കപ്പലിന്റെ നിയന്ത്രണം നഷ്ടമായി കടലിലൂടെ ഒഴുകുകയാണ്. ചെറു ബോട്ടുകളിലെത്തിയ സംഘമാണ് കപ്പല്‍ ആക്രമിച്ചത്. കപ്പലിന്റെ എന്‍ജിന്‍ തകരാറിലായി. 25 ജീവനക്കാരില്‍ 23ഉം ഫിലിപ്പീനികളും രണ്ടു പേര്‍ റഷ്യക്കാരുമാണ്. ആക്രമണത്തില്‍ ആര്‍ക്കും പരിക്കില്ല.
Read more
ആക്രമണമേറ്റ പാനമ കപ്പലില്‍ അടുത്ത തുറമുഖത്തേക്കു വഴിതിരിച്ചു വിട്ടു. ഹൂതി വിമതരുടെ ആക്രമണത്തിന് പിന്നാലെ ചെങ്കടലില്‍ അമേരിക്കയുടെ സൈനിക സാനിധ്യം വര്‍ദ്ധിപ്പിച്ചിട്ടുണ്ട്.
