കാണാതായ സ്ത്രീയെ തിരച്ചിലിനൊടുവില്‍ പെരുമ്പാമ്പ് വിഴുങ്ങിയ നിലയില്‍ കണ്ടെത്തി. ഇന്തോനേഷ്യയിലെ സൗത്ത് സുലാവെസി പ്രവിശ്യയില്‍ വെള്ളിയാഴ്ചയാണ് സംഭവം നടന്നത്. വ്യാഴാഴ്ച കാണാതായ 45കാരിയായ ഫരീദയ്ക്കായി ഗ്രാമവാസികള്‍ തിരച്ചില്‍ നടത്തിയിരുന്നു. വെള്ളിയാഴ്ചയാണ് മൃതദേഹം കണ്ടെത്തുന്നത്.
നാല് കുട്ടികളുടെ മാതാവായ ഫരീദയെ വ്യാഴാഴ്ച മുതല്‍ കാണാതായതിനെ തുടര്‍ന്ന് പ്രദേശത്ത് വ്യാപക തിരച്ചില്‍ നടന്നിരുന്നു. എന്നാല്‍ വ്യാഴാഴ്ചത്തെ തിരച്ചിലില്‍ ഫലം കണ്ടിരുന്നില്ല. പിറ്റേ ദിവസം നടത്തിയ തിരച്ചിലിലാണ് ഇരയെടുത്ത് കിടന്നിരുന്ന പെരുമ്പാമ്പ് ഗ്രാമവാസികളുടെ ശ്രദ്ധയില്‍പ്പെട്ടത്.
Read more
സമീപത്ത് നിന്ന് ഫരീദയുടെ ചെരുപ്പും വസ്ത്രത്തിന്റെ ഭാഗങ്ങളും കണ്ടെത്തിയതോടെ സംശയം തോന്നിയ നാട്ടുകാര്‍ പെരുമ്പാമ്പിനെ പിടികൂടുകയായിരുന്നു. 16 അടിയോളം നീളമുള്ള പെരുമ്പാമ്പിന്റെ വയറുകീറി പരിശോധിച്ചതോടെയാണ് ഫരീദയുടെ മൃതദേഹം കണ്ടെത്തിയത്. വസ്ത്രങ്ങള്‍ ഉള്‍പ്പെടെ സ്ത്രീയെ പൂര്‍ണ്ണമായും പെരുമ്പാമ്പ് വിഴുങ്ങുകയായിരുന്നു.
