ഫാമിലി വിസയ്ക്കും ടൂറിസ്റ്റ് വിസയ്ക്കും അടക്കം അപ്ലിക്കേഷൻ നൽകുന്ന കാര്യം കുവൈത്ത് താമസകാര്യ വിഭാഗത്തിന്റെ സജീവ പരിഗണയിൽ. യോഗ്യതയുള്ള പ്രവാസികൾക്ക് ജവാസാത്തുകളിൽ പോകാതെ തന്നെ ഓൺലൈൻ വഴി വിസയ്ക്ക് അപേക്ഷിക്കാവുന്ന സംവിധാനമാണ് പരിഗണനയിലുള്ളത്.
ഫാമിലി വിസയും വിനോദ സഞ്ചാര വിസയും അനുവദിക്കുന്നതിന് പുതിയ മെക്കാനിസം നടപ്പാക്കുമെന്ന് കുവെെത്ത് ആഭ്യന്തര മന്ത്രാലയത്തിലെ താമസകാര്യ വിഭാഗം മുൻപ് അറിയിപ്പ് നൽകിയിരുന്നു.
വിസ വിതരണവുമായി ബന്ധപ്പെട്ട റെസിഡൻസി അഫയേഴ്സ് ഡിപ്പാർട്ടമെന്റ് ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് അഹമ്മദ് അൽ-നവാഫിന് സമർപ്പിച്ച നിർദേശങ്ങളിൽ ഓൺലൈൻ സംവിധാനം നടപ്പാക്കണമെന്ന നിർദേശവും ഉണ്ടെന്നാണ് സൂചന.
കുവൈത്തിൽ സ്ഥിരതാമസക്കാരായ വിദേശികൾക്ക് മൂന്നുമാസ കാലാവധിയുള്ള ഫാമിലി, ടൂറിസ്റ്റ് വിസിറ്റ് വിസ ലഭിക്കാൻ നിലവിലെ നിയമപ്രകാരം 250 ദിനാർ ആണ് കുറഞ്ഞ ശമ്പളനിരക്ക്. ഇത് വർധിപ്പിക്കണമെന്ന നിർദേശവും താമസകാര്യ വകുപ്പ് മുന്നോട്ടു വെച്ചിട്ടുണ്ട്.
ജീവിത പങ്കാളി, മക്കൾ എന്നിവരെ സന്ദർശന വിസയിൽ കൊണ്ടുവരാൻ കുറഞ്ഞത് 300 ദീനാറും മാതാപിതാക്കളെ കൊണ്ടുവരാൻ കുറഞ്ഞത് 600 ദീനാറും ആക്കി വർദ്ധിപ്പിക്കാനാണു ശിപാർശ. കോവിഡിന് ശേഷം വളരെ പരിമിതമായ തോതിലാണ് കുടുംബസന്ദർശന വിസ അനുവദിച്ചിരുന്നത്.