ഗള്‍ഫിലെ പ്രവാസികളുടെ നാട്ടിലേക്കുള്ള മടക്കം ഇന്നും തുടരും. സൗദിയില്‍ നിന്നും ബഹറിനില്‍ നിന്നുമാണ് ഇന്ന് വിമാനങ്ങള്‍ പ്രവാസികളെയുമായി നാട്ടിലേക്ക് എത്തുക. സൗദിയില്‍ നിന്ന് കോഴിക്കോടേക്കും ബഹറിനില്‍ നിന്ന് കൊച്ചിയിലേക്കുമാണ് സര്‍വീസ്.
റിയാദ് വിമാനത്താവളത്തില്‍ നിന്നുള്ള ആദ്യ വിമാനം ഇന്ത്യന്‍ സമയം ഉച്ചയ്ക്ക് 3.15 നു കോഴിക്കോട്ടേക്ക് പുറപ്പെടും. രജിസ്റ്റര്‍ ചെയ്ത അറുപതിനായിരം പ്രവാസികളില്‍ നിന്ന് തിരഞ്ഞെടുത്ത 162 പേര്‍ക്കാണ് ടിക്കറ്റ് നല്‍കിയിരിക്കുന്നത്. യാത്രക്കാര്‍ രാവിലെ പ്രാദേശികസമയം ഒന്‍പതു മണിയോടെ വിമാനത്താവളത്തില്‍ റിപ്പോര്‍ട്ട് ചെയ്യണമെന്നാണ് നിര്‍ദേശം. വിമാനത്താവളത്തില്‍ തെര്‍മല്‍ സ്‌കാനിംഗ് നടത്തിയ ശേഷമായിരിക്കും വിമാനത്തിനുള്ളിലേക്കു പ്രവേശനം. വിമാനത്തിനുള്ളില്‍ ഭക്ഷണ വിതരണമുണ്ടാകില്ലെന്ന് എംബസി അറിയിച്ചിട്ടുണ്ട്.
ബഹറിന്‍ രാജ്യന്തര വിമാനത്താവളത്തില്‍ നിന്ന് നെടുമ്പാശ്ശേരിയിലേക്കുള്ള വിമാനം ഇന്ത്യന്‍ സമയം വൈകിട്ട് ഏഴിനാവും പുറപ്പെടുക. ബഹറിനില്‍ രജിസ്റ്റര്‍ ചെയ്ത പന്ത്രണ്ടായിരത്തോളം പ്രവാസികളില്‍ നിന്ന് 177 പേരാണ് യാത്രക്കൊരുങ്ങുന്നത്.