സൗദിയില്‍ നിന്നും കെ.എം.സി.സി ചാര്‍ട്ട് ചെയ്യുന്ന ആദ്യ വിമാനം ഇന്ന് റിയാദില്‍ നിന്നും കോഴിക്കോട്ടേക്ക് പുറപ്പെടും. 175 യാത്രക്കാരെ ഉള്‍ക്കൊള്ളുന്ന സ്‌പൈസ് ജെറ്റിന്റെ ബോയിംഗ് 737 വിമാനം വൈകീട്ട് 5.30ന് റിയാദ് കിംഗ് ഖാലിദ് അന്താരാഷ്ട്ര വിമാനത്താവളത്തില്‍ നിന്ന് യാത്ര തിരിക്കും. ശനിയാഴ്ച പുലര്‍ച്ച ഒരു മണിയോടെ വിമാനം കോഴിക്കോട് വിമാനത്താവളത്തിലെത്തും.
യാത്രക്കുള്ള കേന്ദ്ര, സംസ്ഥാന സര്‍ക്കാരുകളുടെയും ഇന്ത്യന്‍ എംബസിയുടെയും അന്തിമ അനുമതി ലഭിച്ചതായി സെന്‍ട്രല്‍ കമ്മിറ്റി പ്രസിഡന്റ് സി.പി മുസ്തഫ പറഞ്ഞു. യാത്രക്കാര്‍ വെള്ളിയാഴ്ച ഉച്ചക്ക് 1.30ന് മുമ്പ് റിയാദ് വിമാനത്താവളത്തിലെത്തണം. 25 കിലോ ഭാരമുള്ള സിംഗിള്‍ ബാഗേജും ഏഴ് കിലോ ഭാരമുള്ള ഹാന്‍ഡ് ബാഗേജുമാണ് അനുവദിക്കുന്നത്.
എംബസിയില്‍ പേര് രജിസ്റ്റര്‍ ചെയ്തവരില്‍ നിന്ന് മുന്‍ഗണനാക്രമത്തില്‍ ഗര്‍ഭിണികളെയും രോഗികളെയും ഉള്‍പ്പെടുത്തിയാണ് ലിസ്റ്റ് തയ്യാറാക്കിയിരിക്കുന്നത്. കെ.എം.സി.സി ഇതിനായി പ്രത്യേക രജിസ്ട്രേഷന്‍ സ്വീകരിച്ചാണ് അന്തിമപട്ടിക തയ്യാറാക്കിയത്.