എമിറേറ്റ്‌സ് ലോട്ടോ നറുക്കെടുപ്പില്‍ ഭാഗ്യസമ്മാനത്തിന് അര്‍ഹരായി മലയാളികള്‍. രണ്ട് മലയാളികളടക്കം 5 ഇന്ത്യക്കാര്‍ക്കും ഒരു യുഎഇ സ്വദേശി, ഒരു സിറിയന്‍ വംശജനുമാണ് 30 ലക്ഷത്തോളം രൂപ (1,42,857 ദിര്‍ഹം) വീതം ലഭിച്ചത്. 10 ലക്ഷം ദിര്‍ഹമുള്ള രണ്ടാം സമ്മാനം ഏഴു പേര്‍ പങ്കിട്ടെടുക്കുകയായിരുന്നു.
മലയാളികളായ മുനീര്‍ കുന്നത്ത്, അരുണ്‍ ഉണ്ണികൃഷ്ണപിള്ള എന്നിവരെയാണ് കോവിഡ് ദുരിത കാലത്ത് ഭാഗ്യം തേടിയെത്തിയത്. ഏറെ സന്തോഷമുണ്ടെന്നും സ്വന്തമായി ഒരു വീടെന്ന സ്വപ്നം സാക്ഷാത്കരിക്കാന്‍ ഇത് സഹായകമാകുമെന്നും മുനീര്‍ പറഞ്ഞു. ഈ സമ്മാനം കുടുംബത്തിന് താങ്ങാവുമെന്നുമായിരുന്നു അരുണിന്റെ പ്രതികരണം.
ഫത്‌വ മുഖേന അംഗീകരിക്കപ്പെട്ട മേഖലയിലെ ഒരേയൊരു സമ്മാന പദ്ധതി കൂടിയായ എമിറേറ്റ്‌സ് ലോട്ടോയില്‍ ഇപ്രാവശ്യവും 100 കോടിയിലേറെ രൂപ സ്വന്തമാക്കിയ ഒന്നാം സമ്മാനക്കാരനില്ല. ഏപ്രില്‍ 18നായിരുന്നു പ്രതിവാര എമിറേറ്റ്‌സ് ലോട്ടോ ആരംഭിച്ചത്. എല്ലാ ശനിയാഴ്ചയും രാത്രി 9ന് നടക്കുന്ന നറുക്കെടുപ്പ് www.emiratesloto.com എന്ന സൈറ്റില്‍ തത്സമയം കാണാം.