ഇന്ത്യന്‍ പ്രീമിയര്‍ ലീഗ് 2024-ല്‍ സണ്‍റൈസേഴ്സ് ഹൈദരാബാദിനായി മിന്നുന്ന ഫോമിലായിരുന്ന അഭിഷേക് ശര്‍മ്മ. ഇപ്പോഴിതാ ഐപിഎല്‍ സീസണിനും ശേഷവും മിന്നും പ്രകടനം തുടരുകയാണ് താരം. ഗുരുഗ്രാമില്‍ നടന്ന ഒരു ക്ലബ് ഗെയിമില്‍ താരം വെടിക്കെട്ട് പ്രകടനമാണ് കാഴ്ചവെച്ചത്. 26 പന്തില്‍ 14 സിക്സും 4 ഫോറും സഹിതം 103 റണ്‍സാണ് താരം അടിച്ചെടുത്തത്. 396 സ്ട്രൈക്ക് റേറ്റിലാണ് അദ്ദേഹത്തിന്റെ പ്രകടനം.
ഐപിഎല്‍ 17-ാം സീസണില്‍ 200-ന് മുകളില്‍ സ്ട്രൈക്ക് റേറ്റില്‍ സൗത്ത്പാവ് 400-ലധികം റണ്‍സ് നേടിയിരുന്നു. ടൂര്‍ണമെന്റിന്റെ ഫൈനലിലേക്കുള്ള സണ്‍റൈസേഴ്‌സിന്റെ യാത്രയില്‍ യുവതാരം ഒരു പ്രധാന പങ്ക് വഹിച്ചു.
2024 ലെ ഐസിസി ടി20 ലോകകപ്പിന് ശേഷം വരാനിരിക്കുന്ന സിംബാബ്വെയ്ക്കെതിരായ അഞ്ച് മത്സര ടി20 പരമ്പരയില്‍ അദ്ദേഹത്തെ ഉള്‍പ്പെടുത്തിയേക്കും. ക്യാപ്റ്റന്‍ രോഹിത് ശര്‍മ്മ തന്റെ അവസാന ആഗോള ഇവന്റില്‍ കളിക്കുന്നതിനാല്‍, അഭിഷേക് മെന്‍ ഇന്‍ ബ്ലൂയ്ക്കായി ഇന്നിംഗ്സ് തുറക്കുമെന്ന് പ്രതീക്ഷിക്കുന്നു.
മുന്‍ താരങ്ങളായ ഹര്‍ഭജന്‍ സിഗും അമ്പാട്ടി റായിഡുവും അഭിഷേക് അമേരിക്കയിലും വെസ്റ്റ് ഇന്‍ഡീസിലും നടക്കുന്ന ടി20 ലോകകപ്പില്‍ കളിക്കണമെന്ന് ആഗ്രഹിച്ചിരുന്നു. എന്നാലത് സംഭവിച്ചില്ല.