ഐപിഎല്‍ ടീം സണ്‍റൈസേഴ്‌സ് ഹൈദരാബാദമായുള്ള ബന്ധം അവസാനിപ്പിക്കുന്നതിന്റെ സൂചന നല്‍കി ഇടംകൈയന്‍ ഓപ്പണര്‍ ഡേവിഡ് വാര്‍ണര്‍. സോഷ്യല്‍ മീഡിയ കുറിപ്പിലൂടെയാണ് വാര്‍ണര്‍ സണ്‍റൈസേഴ്‌സ് വിടുന്നതായി പറയാതെ പറഞ്ഞത്.
നിങ്ങള്‍ സമ്മാനിച്ച ഓര്‍മ്മകള്‍ക്ക് നന്ദി. കളത്തില്‍ നൂറ് ശതമാനവും സമര്‍പ്പിക്കാന്‍ എല്ലായ്‌പ്പോഴും പ്രചോദിപ്പിച്ച ആരാധകര്‍ക്ക് നന്ദി പറയുന്നു. നിങ്ങള്‍ നല്‍കിയ പിന്തുണയ്ക്ക് നന്ദി പറഞ്ഞാല്‍ തീരില്ല. ഇതൊരു മഹത്തായ യാത്രയായിരുന്നു. ഞാനും എന്റെ കുടുംബവും നിങ്ങളെ മിസ് ചെയ്യും- വാര്‍ണര്‍ ഇന്‍സ്റ്റഗ്രാമില്‍ കുറിച്ചു.
സണ്‍റൈസേഴ്‌സിന്റെ എക്കാലത്തെയും മികച്ച ബാറ്റര്‍മാരുടെ പട്ടികയിലാണ് വാര്‍ണര്‍ക്ക് ഇടം. ഐപിഎല്ലില്‍ 5449 റണ്‍സാണ് വാര്‍ണര്‍ ഇതുവരെ സമ്പാദിച്ചത്. 2016ല്‍ സണ്‍റൈസേഴ്‌സിനെ കിരീട നേട്ടത്തിലേക്ക് നയിക്കാനും വാര്‍ണര്‍ക്ക് സാധിച്ചു. എന്നാല്‍ ഇക്കുറി വാര്‍ണര്‍ പാടേ നിറംമങ്ങി. അതോടെ ക്യാപ്റ്റന്‍ പദവിയും ടീമിലെ സ്ഥാനവും നഷ്ടമായി. ഐപിഎല്ലിന്റെ യുഎഇ ലെഗില്‍ രണ്ടു മത്സരങ്ങളില്‍ മാത്രമേ വാര്‍ണര്‍ കളിച്ചിരുന്നുള്ളൂ.