സൂപ്പര്‍ താരം നഥാന്‍ കോള്‍ട്ടര്‍നൈല്‍ ഐപിഎല്ലില്‍ നിന്ന് പരിക്കേറ്റ് പുറത്തായതിന്റെ ഞെട്ടലിലാണ് രാജസ്ഥാന്‍ റോയല്‍സ്. സീസണിന്റെ തുടക്ക സമയമായതിനാല്‍ കോള്‍ട്ടര്‍നൈലിന് പകരക്കാരനെ ടീമിലെത്തിക്കാനുള്ള നീക്കങ്ങള്‍ രാജസ്ഥാന്‍ ആരംഭിച്ചതായാണ് സൂചന.
നഥാന്‍ കോള്‍ട്ടര്‍നൈലിന് പകരക്കാരനായി രാജസ്ഥാന്‍ റോയല്‍സിലെത്താന്‍ ഏറ്റവുമധികം സാധ്യതയുള്ള താരം ശ്രീലങ്കയുടെ ലിമിറ്റഡ് ഓവര്‍ നായകന്‍ ദാസന്‍ ഷനകയാണ്. വെടിക്കെട്ട് ബാറ്റിംഗിന് കെല്‍പ്പുള്ള താരം മീഡിയം പേസ് ബൗളറുമാണ്.
ലങ്കന്‍ ഇതിഹാസങ്ങളായ സംഗക്കാരയും, ലസിത് മലിംഗയും രാജസ്ഥാന്റെ പരിശീലക സംഘത്തിലുള്ളത് ഷനകയുടെ സാധ്യത വര്‍ധിപ്പിക്കുന്നു. ഈയടുത്ത് ഇന്ത്യക്കെതിരെ നടന്ന ടി20 പരമ്പരയില്‍ ഉജ്ജ്വല പ്രകടനമായിരുന്നു താരത്തിന്റേത്.
ന്യൂസിലന്‍ഡില്‍ നിന്നുള്ള സ്റ്റാര്‍ ഓള്‍ റൗണ്ടര്‍ കോളിന്‍ ഡി ഗ്രാന്‍ഡ് ഹോം, ബിഗ് ബാഷ് ലീഗില്‍ മിന്നും പ്രകടനങ്ങളിലൂടെ ശ്രദ്ധിക്കപ്പെട്ട ഹെയ്ഡന്‍ കെര്‍, ടി20 ക്രിക്കറ്റില്‍ മികച്ച പരിചയസമ്പത്തുള്ള ദക്ഷിണാഫ്രിക്കന്‍ ഓള്‍ റൗണ്ടറാണ് ഡേവിഡ് വീസെ, കൂറ്റന്‍ സിക്‌സറുകള്‍ക്ക് പേരുകേട്ട ഓസീസ് താരമാണ് ബെന്‍ കട്ടിംഗ് എന്നിവരാണ് പകരക്കാരായി വരാന്‍ സാധ്യതയുള്ള മറ്റ് പ്രധാന താരങ്ങള്‍.