മലയാളി താരം സഞ്ജു സാംസണിനു ഇന്ത്യന്‍ ടീമിനൊപ്പം കളിക്കുമ്പോള്‍ പലപ്പോഴും തിളങ്ങാന്‍ കഴിയാതെ പോവുന്നതിന്റെ കാരണം ചൂണ്ടിക്കാട്ടി മുന്‍ താരം ആകാശ് ചോപ്ര. ക്രീസിലെത്തിയാല്‍ ഒരുപാട് ഷോട്ടുകള്‍ കളിക്കാന്‍ ശ്രമിച്ച് വിക്കറ്റ് വലിച്ചെറിയുന്ന ശീലക്കാരനാണ് സഞ്ജുവെന്ന് ചോപ്ര പറഞ്ഞു.
സഞ്ജു സാംസണിന്റെ ഏറ്റവും വലിയ പ്രശ്നമായി എനിക്കു തോന്നിയിട്ടുള്ളത് അദ്ദേഹം ഒരുപാട് ഷോട്ടുകള്‍ കളിക്കാന്‍ തുനിയുന്നുവെന്നതാണ്. ഈ തരത്തില്‍ നിരവധി ഷോട്ടുകള്‍ക്കു ശ്രമിച്ച് സഞ്ജു വിക്കറ്റും നഷ്ടപ്പെടുത്തുന്നു. സഞ്ജൂ, നിങ്ങള്‍ക്കു എങ്ങനെ ഇതു ചെയ്യാന്‍ കഴിയും? നിങ്ങള്‍ക്കു ഇതു നല്ലൊരു അവസരമാണ്. പക്ഷെ അതു നിങ്ങള്‍ വേണ്ടെന്നു വയ്ക്കുകയാണ്- ചോപ്ര കുറ്റപ്പെടുത്തി.
സഞ്ജു സാംസണ്‍ തീര്‍ച്ചയായും വളരെയധികം അദ്ഭുതപ്പെടുത്തുന്ന, കഴിവുറ്റ താരം തന്നെയാണ്. അക്കാര്യത്തില്‍ ആര്‍ക്കും സംശയമില്ല. സഞ്ജു റണ്‍സ് സ്‌കോര്‍ ചെയ്യുന്നതു കാണുമ്പോള്‍ ബാറ്റിംഗ് ഇത്ര എളുപ്പമാണോയെന്നു നമുക്കു തോന്നും- ചോപ്ര കൂട്ടിച്ചേര്‍ത്തു.
ബംഗ്ലാദേശുമായുളള ആദ്യ ടി20 മല്‍സരത്തില്‍ ഓപ്പണറായി പ്രൊമോഷന്‍ ലഭിച്ച സഞ്ജു നന്നായി തന്നെ തുടങ്ങിയെങ്കിലും ഒരിക്കല്‍ക്കൂടി ഇതൊരു വലിയ സ്‌കോറാക്കി മാറ്റിയെടുക്കുന്നതില്‍ പരാജയപ്പെട്ടു. 19 ബോളില്‍ ആറു ഫോറുകളടടക്കം 29 റണ്‍സ് നേടിയ താരം പക്ഷെ സ്പിന്നര്‍ മെഹ്ദി ഹസന്‍ മിറാസിനെതിരേ ഒരു മോശം ഷോട്ട് കളിച്ച് വിക്കറ്റ് നഷ്ടപ്പെടുത്തുകയായിരുന്നു.