ഏകദിന ലോകകപ്പിൽ വ്യാഴാഴ്ച നടക്കുന്നത് ഇന്ത്യ- ബംഗ്ലാദേശ് പോരാട്ടമാണ്. എന്നാൽ ഇന്ത്യയെ തോൽപ്പിച്ചാൽ ബംഗ്ലാദേശ് താരങ്ങൾക്ക് വമ്പൻ ഒരു ഓഫറാണ് മുന്നിലുള്ളത്. പാക് നടി സെഹാർ ഷിൻവാരിയുടേതാണ് ഓഫർ.
ഇന്ത്യയെ തോൽപ്പിക്കുകയാണെങ്കിൽ ബംഗ്ലാദേശ് ടീമിലെ ഏതെങ്കിലുമൊരു താരത്തിനൊപ്പം ധാക്കയിൽ ഡേറ്റിന് വരാം എന്നാണ് പാക് നടിയുടെ ഓഫർ. സോഷ്യൽ മീഡിയ പ്ലാറ്റ്ഫോമായ എക്സിലൂടെയാണ് സെഹാർ ഷിൻവാരി ഓഫർ മുന്നോട്ട് വെച്ചത്.
‘ഇൻഷാ അള്ളാ, എന്‍റെ ബംഗാളി ബന്ധുക്കള്‍ ഇന്ത്യയോട് പ്രതികാരം തീര്‍ക്കുമെന്നാണ് ഞാന്‍ കരുതുന്നത്.ബംഗ്ലാദേശ് ഇന്ത്യയെ തോല്‍പ്പിക്കുകയാണെങ്കില്‍ ഞാന്‍ ധാക്കയില്‍ ചെന്ന് അവരുടെ ടീമിലെ ഒരു താരത്തിനൊപ്പം ഫിഷ് ഡിന്നര്‍ ഡേറ്റിന് തയാറാണ് ‘ എന്നായിരുന്നു പാക് നടി പങ്കുവെച്ചത്.
കഴിഞ്ഞ മത്സരത്തിൽ ക്രിക്കറ്റിലെ ചിരവൈരികളായ പാകിസ്ഥാനെ ഇന്ത്യ വലിയ മാർജിനിൽ തോൽപ്പിച്ചിരുന്നു. ലോകകപ്പിൽ പാകിസ്താനെതിരെ ഇന്ത്യ നേടുന്ന എട്ടാമത്തെ വിജയം കൂടിയായിരുന്നു അത്.
എന്തായാലും അടുത്ത മത്സരത്തെ ആകാംക്ഷയോടെയാണ് ക്രിക്കറ്റ് പ്രേമികൾ നോക്കികാണുന്നത്. പൂനെയിലെ എം. സി. എ സ്റ്റേഡിയത്തിലാണ് കളി നടക്കുന്നത്.