ഇന്ത്യന്‍ ടീമിലെ യുവതാരങ്ങളില്‍ ഏറ്റവും ശക്തമായ പ്രതിരോധ മികവുള്ള കളിക്കാരന്‍ ആരെന്ന് പറഞ്ഞ് ഇന്ത്യന്‍ മുന്‍ താരം ആര്‍ അശ്വിന്‍. ഇന്ത്യന്‍ വിക്കറ്റ് കീപ്പര്‍ ബാറ്ററായ റിഷഭ് പന്തിനെയാണ് അശ്വിന്‍ മികച്ച ഡിഫന്‍ഡറായി തിരഞ്ഞെടുത്തത്. നെറ്റ്സില്‍ പല തവണ പന്തിനെതിരെ ബോള്‍ ചെയ്തിട്ടുണ്ടെങ്കിലും ഒരിക്കല്‍പ്പോലും ഔട്ടാക്കാന്‍ കഴിഞ്ഞിട്ടില്ലെന്ന് അശ്വിന്‍ പറയുന്നു.
പ്രതിരോധിക്കാന്‍ ശ്രമിച്ചതിനു ശേഷം വളരെ അപൂര്‍വ്വമായി മാത്രമേ റിഷഭ് പന്ത് പുറത്തായിട്ടുള്ളൂ. ലോകത്തിലെ തന്നെ ഏറ്റവും മികച്ച ഡിഫന്‍സുള്ള താരങ്ങളിലൊരാളാണ് അവന്‍. പ്രതിരോധമെന്നത് വളരെയധികം വെല്ലുവിളിയുയര്‍ത്തുന്നതായി മാറിയിരിക്കുകയാണ്. സോഫ്റ്റ് ഹാന്റ് കൊണ്ട് റിഷഭിന്റെ ഡിഫന്‍സാണ് ഏറ്റവും മികച്ചത്.
നെറ്റ്സില്‍ അവനെതിരേ ഞാന്‍ ഒരുപാട് തവണ ബോള്‍ ചെയ്തിട്ടുണ്ട്. പക്ഷെ പുറത്താക്കാന്‍ എനിക്കു കഴിഞ്ഞിട്ടില്ല. അവന്‍ എഡ്ജാവുകയോ, എല്‍ബിഡബ്ല്യുവാകുകയോ ചെയ്തിട്ടില്ല. റിഷഭിന്റെ പ്രതിരോധ മികവ് അത്ര മാത്രം ശക്തമാണ്- അശ്വിന്‍ പറഞ്ഞു.
ഇത്തവണ സിഡ്നിയില്‍ ഓസീസിനെതിരെ രണ്ടു വ്യത്യസ്ത ഇന്നിങ്സുകളാണ് റിഷഭ് പന്ത് കളിച്ചത്. ആദ്യ ഇന്നിങ്സില്‍ ബാറ്റ് ചെയ്യവെ അവന്റെ ശരീരത്തിന്റെ പല ഭാഗങ്ങളിലും ബോള്‍ കൊണ്ടിരുന്നു. എന്നിട്ടു 40 റണ്‍സ് റിഷഭ് സ്‌കോര്‍ ചെയ്തു. അവന്റെ അധികം സംസാരിക്കപ്പെടാത്ത ഇന്നിങ്സ് കൂടിയായിരിക്കും ഇത്. തീര്‍ച്ചയായും ഇതു നീതികേടാണ്- അശ്വിന്‍ കൂട്ടിച്ചേര്‍ത്തു.