ക്രിക്കറ്റ് ലോകം മുഴുവന്‍ ഏഷ്യാ കപ്പിനെ വാഴ്ത്തുമ്പോഴും താന്‍ ഒരു മല്‍സരം പോലും കണ്ടില്ലെന്നു വെളിപ്പെടുത്തി ഓസ്ട്രേലിയന്‍ സ്റ്റാര്‍ പേസര്‍ പാറ്റ് കമ്മിന്‍സ്. ഇന്ത്യക്കെതിരേ ചൊവ്വാഴ്ച ആരംഭിക്കാനിരിക്കുന്ന ടി20 പരമ്പരയ്ക്കു മുന്നോടിയായി സംസാരിക്കുകയായിരുന്നു കമ്മിന്‍സ്.
‘സത്യസന്ധമായി പറയുകയാണെങ്കില്‍ ഏഷ്യാ കപ്പിലെ ഒരു മല്‍സരം പോലും ഞാന്‍ കണ്ടിട്ടില്ല. ശ്രീലങ്കയാണ് ചാംപ്യന്‍മാരായതെന്നാണ് ഞാന്‍ കരുതുന്നത്. പക്ഷെ വിരാട് കോഹ്‌ലിയെ കുറിച്ച് അറിഞ്ഞിരുന്നു. അദ്ദേഹം സെഞ്ച്വറി നേടിയിരുന്നുവെന്നാണ് തോന്നുന്നത്.’
‘കോഹ്‌ലി ഒരു ക്ലാസ് പ്ലെയറാണ്. ഏതെങ്കിലുമൊരു സമയത്ത് അദ്ദേഹം ഫോമിലേക്കു മടങ്ങിയെത്തുക തന്നെ ചെയ്യുമെന്നുറപ്പായിരുന്നു. വരാനിരിക്കുന്ന ടി20 പരമ്പരയില്‍ ഞങ്ങള്‍ക്ക് വലിയ വെല്ലുവിളി തന്നെയായിരിക്കും കോഹ്‌ലി’ കമ്മിന്‍സ് പറഞ്ഞു.
അഫ്ഗാനിസ്താനെതിരായ സൂപ്പര്‍ ഫോറിലെ മൂന്നാമത്തെയും അവസാനത്തെയു മല്‍സരത്തിലായിരുന്നു കോഹ്‌ലിയുടെ സെഞ്ച്വറി പ്രകടനം. മത്സരത്തില്‍ ഓപ്പണറായി ഇറങ്ങിയ താരം 61 ബോളില്‍ 122 റണ്‍സ് അടിച്ചെടുത്തു. 2019നു ശേഷം താരത്തിന്റെ ആദ്യ അന്താരാഷ്ട്ര സെഞ്ച്വറിയും ടി20 ഫോര്‍മാറ്റില്‍ കന്നി സെഞ്ച്വറി കൂടിയായിരുന്നു ഇത്.