നിതീഷ് റാണയുടെ ഭാര്യ സച്ചി മര്‍വയ്ക്ക് നേരെ ആക്രമണശ്രമം. മെയ് 04 ന് സച്ചി ജോലി കഴിഞ്ഞ് വീട്ടിലേക്ക് പോകുമ്പോഴായിരുന്നു സംഭവം. രണ്ട് യുവാക്കള്‍ സച്ചി ഓഫീസില്‍ നിന്ന് മടങ്ങുമ്പോള്‍ അവരെ ബൈക്കില്‍ പിന്തുടരുകയും കാറില്‍ ഇടിക്കുകയും ചെയ്തു. സംഭവത്തില്‍ സച്ചി ഡല്‍ഹി പൊലീസിനെ സമീപിച്ചെങ്കിലും സഹായമൊന്നും ലഭിച്ചില്ല.
സഹായം അഭ്യര്‍ത്ഥിച്ച് സച്ചി പൊലീസില്‍ പരാതിപ്പെട്ടപ്പോള്‍ ”ഇപ്പോള്‍ നിങ്ങള്‍ സുരക്ഷിതമായി വീട്ടിലെത്തി, അത് പോകട്ടെ! അടുത്ത തവണ നമ്പര്‍ നോട്ട് ചെയ്തു നല്‍കൂ” എന്നാണ് ഉദ്യാഗസ്ഥര്‍ പ്രതികരിച്ചതെന്ന് സച്ചി ഇന്‍സ്റ്റാഗ്രാമില്‍ പങ്കുവെച്ച സ്‌റ്റോറിയില്‍ പറഞ്ഞു. പോസ്റ്റ് ഡല്‍ഹി പൊലീസിനെ ടാഗ് ചെയ്ത സച്ചി അടുത്ത തവണ അവരുടെ ഫോണ്‍ നമ്പര്‍ കൂടി സംഘടിപ്പിച്ച് തരാമെന്ന് പരിഹസിച്ച് തന്നെ പിന്തുടരുന്ന യുവാക്കളുടെ ചിത്രങ്ങളും പങ്കുവെച്ചു.
ഉദ്യോഗസ്ഥര്‍ സച്ചിയെ സഹായിക്കാത്തതിനാല്‍ സോഷ്യല്‍ മീഡിയയില്‍ പ്രതിഷേധം തലപൊക്കിയിട്ടുണ്ട്. ഇത്തവണ റാണയുടെ ഭാര്യ ഒരു കേടുപാടും കൂടാതെ രക്ഷപ്പെട്ടു, അത് എല്ലായ്‌പ്പോഴും അങ്ങനെ തന്നെ ആയിരിക്കില്ലെന്നാണ് സോഷ്യല്‍ മീഡിയ പ്രതികരണം. ഈ രണ്ട് പേര്‍ക്കും കര്‍ശനമായ ശിക്ഷ ലഭിക്കണമെന്നും ആളുകള്‍ പറയുന്നു.
നിതീഷ് റാണ ഇപ്പോള്‍ ഐപിഎല്‍ മത്സരങ്ങളുടെ തിരക്കിലാണ്. നിലവില്‍ കെകെആര്‍ ടീമിന്റെ നായകനാണ് താരം. പരിക്കേറ്റ ശ്രേയസ് അയ്യര്‍ക്ക് പകരമാണ് റാണയെ ടീം നായകനാക്കിയത്. എന്നാല്‍ ടീം പ്ലേഓഫ് കാണുമോ എന്ന് സംശയമാണ്. 10 മത്സരങ്ങള്‍ പൂര്‍ത്തിയായപ്പോള്‍ നാല് മത്സരങ്ങള്‍ മാത്രമാണ് കെകെആറിന് ജയിക്കാനായത്. വിജയങ്ങള്‍ മാത്രമല്ല, കെകെആറിന് അവരുടെ വഴിക്ക് പോകാന്‍ കുറച്ച് നല്ല ഫലങ്ങള്‍ ആവശ്യമാണ്.