ഓസീസ് വെറ്ററന്‍ ബാറ്റര്‍ ഡേവിഡ് വാര്‍ണര്‍ ഇപ്പോള്‍ തന്റെ വിടവാങ്ങല്‍ ടെസ്റ്റ് പരമ്പര കളിക്കുകയാണ്. സിഡ്നിയില്‍ നടക്കുന്ന മൂന്നാമത്തെയും അവസാനത്തെയും മത്സരത്തില്‍ ഓസ്ട്രേലിയ പാകിസ്ഥാനെ നേരിട്ടു കഴിയുമ്പോള്‍ വാര്‍ണറിന്റെ ടെസ്റ്റ് കരിയറിന് തിരശീല വീഴും. എന്നാല്‍ അതിനിടയില്‍ വലിയൊരു സങ്കടം പങ്കുവെച്ചിരിക്കുകയാണ് താരം.
മത്സരത്തിനായി സിഡ്‌നിയിലേക്കുള്ള യാത്രയ്ക്കിടെ തന്റെ ബാഗി ഗ്രീന്‍ (ടെസ്റ്റ് ക്യാപ്) മോഷണം പോയെന്നാണ് ഡേവിഡ് വാര്‍ണറുടെ പരാതി. ബാക്ക്പാക്ക് ബാഗിനുള്ളിലാണു തൊപ്പി സൂക്ഷിച്ചിരുന്നതെന്നും ഇതു കണ്ടെത്താന്‍ സഹായിക്കണമെന്നും വാര്‍ണര്‍ ഇന്‍സ്റ്റഗ്രാമിലെ വിഡിയോയില്‍ അഭ്യര്‍ഥിച്ചു.
എനിക്ക് വളരെയധികം വിലപ്പെട്ടതാണ് അത്. ഞാന്‍ അതിനെ വൈകാരികമായാണു കാണുന്നത്. നിങ്ങള്‍ക്ക് എന്റെ ബാഗ് ആണ് ആവശ്യമെങ്കില്‍ പകരം തരാന്‍ ഒരെണ്ണം എന്റെ കയ്യിലുണ്ട്. നിങ്ങള്‍ക്ക് ഒരു പ്രശ്‌നവും ഉണ്ടാകില്ല.
View this post on Instagram
ക്രിക്കറ്റ് ഓസ്‌ട്രേലിയയേയോ അല്ലെങ്കില്‍ എന്നെയോ സോഷ്യല്‍ മീഡിയ വഴി ബന്ധപ്പെടുക. എന്റെ ബാഗി ഗ്രീന്‍ തിരികെ നല്‍കുകയാണെങ്കില്‍ ഈ ബാഗ് ഞാന്‍ സന്തോഷത്തോടെ നിങ്ങള്‍ക്കു തരാം- ഡേവിഡ് വാര്‍ണര്‍ ഇന്‍സ്റ്റഗ്രാമില്‍ പറഞ്ഞു.
യാത്ര ചെയ്ത വിമാനക്കമ്പനിയെയും താമസിച്ച ഹോട്ടലിനെയും ബന്ധപ്പെട്ടെങ്കിലും ഒരു വിവരവും ലഭിച്ചില്ലെന്നും വാര്‍ണര്‍ കൂട്ടിച്ചേര്‍ത്തു.