ഇന്ത്യക്കെതിരായ ടെസ്റ്റ് പരമ്പരയില്‍ തോറ്റാലും ജയിച്ചാലും തങ്ങള്‍ ബാസ്‌ബോള്‍’ ശൈലിയില്‍ തന്നെ കളിക്കുമെന്ന് ഇംഗ്ലണ്ട് ടെസ്റ്റ് ടീം ഹെഡ് കോച്ച് ബ്രണ്ടന്‍ മക്കല്ലം. ആക്രമണാത്മക ശൈലിയില്‍ കളിക്കുന്ന ഇംഗ്ലണ്ട് ടെസ്റ്റ് ടീമിന്റെ നിലവാരമുള്ള പ്രകടനത്തില്‍ താന്‍ തൃപ്തനാണെങ്കിലും ഇന്ത്യയില്‍ നടക്കുന്ന ടെസ്റ്റ് പരമ്പരയില്‍ വലിയ വെല്ലുവിളി നേരിടേണ്ടി വരുമെന്നും അദ്ദേഹം കൂട്ടിച്ചേര്‍ത്തു.
മക്കല്ലത്തെ പരിശീലകനായി നിയമിച്ചതു മുതല്‍ ഇംഗ്ലണ്ട് ടീം ടെസ്റ്റ് ക്രിക്കറ്റില്‍ ആക്രമണാത്മക ശൈലിയില്‍ കളിക്കുന്ന കാഴ്ചയാണ് കണ്ടത്. മക്കല്ലത്തിന്റെ വിളിപ്പേര് ‘ബാസ്’ ആയിരുന്നതിനാല്‍, ഇംഗ്ലണ്ടിന്റെ ആക്രമണാത്മക കളിയെ ‘ബാസ്‌ബോള്‍’ എന്നാണ് വിളിക്കുന്നത്. മക്കല്ലത്തിന്റെ നേതൃത്വത്തില്‍ ഇംഗ്ലണ്ട് പാക്കിസ്ഥാനില്‍ ടെസ്റ്റ് പരമ്പര സ്വന്തമാക്കിയപ്പോള്‍ ന്യൂസിലന്‍ഡിലെ പരമ്പര 1-1ന് സമനിലയിലായി.
എന്നിരുന്നാലും, ഇന്ത്യന്‍ ടീമിനെ സ്വന്തം തട്ടകത്തില്‍ പരാജയപ്പെടുത്തുക എന്നത് ഏറ്റവും ബുദ്ധിമുട്ടുള്ള വെല്ലുവിളിയായാണ് കണക്കാക്കപ്പെടുന്നത്. അടുത്ത വര്‍ഷം നടക്കാനിരിക്കുന്ന അഞ്ച് മത്സരങ്ങളുടെ ടെസ്റ്റ് പരമ്പരയില്‍ ഇംഗ്ലണ്ട് ഈ വെല്ലുവിളി നേരിടും. ജനുവരി 25 മുതലാണ് പരമ്പര ആരംഭിക്കുക.
ഇന്ത്യക്കെതിരായ ടെസ്റ്റ് പരമ്പരയ്ക്കായി ഞാന്‍ വളരെ ആവേശത്തിലാണ്. മികച്ച ടീമുകള്‍ക്കെതിരെ നിങ്ങള്‍ സ്വയം തെളിയിക്കാന്‍ ശ്രമിക്കുന്നു. സ്വന്തം തട്ടകത്തില്‍ ഇന്ത്യയേക്കാള്‍ മികച്ചതായി ഒരു ടീമും ഇല്ല. അത് ഞങ്ങള്‍ക്ക് വലിയ വെല്ലുവിളിയായിരിക്കും. ഞങ്ങള്‍ വിജയിച്ചാല്‍ അത് വളരെ മികച്ചതാണ്; പക്ഷേ, പരാജയപ്പെട്ടാലും കളിയുടെ ശൈലി മാറ്റില്ല- ബ്രണ്ടന്‍ മക്കല്ലം പറഞ്ഞു.