ഇന്ത്യൻ ക്രിക്കറ്റ് ഇതിഹാസങ്ങളായ രോഹിത് ശർമ്മയ്ക്കും വിരാട് കോഹ്‌ലിക്കും ബിസിസിയിൽ നിന്ന് പുതിയ തിരിച്ചടി കിട്ടിയേക്കാം എന്ന് റിപ്പോർട്ടുകൾ. ഇന്ത്യൻ പുരുഷ ടീമിന്റെ കേന്ദ്ര കരാറുകൾ ബിസിസിഐ പ്രഖ്യാപിക്കാൻ പോകുമ്പോഴാണ് താരങ്ങൾക്ക് പണി കിട്ടാൻ പോകുന്നത്. സാധാരണയായി, വർഷത്തിന്റെ തുടക്കത്തിലാണ് ഈ പ്രഖ്യാപനം നടത്തുക, എന്നാൽ ഇത്തവണത്തെ കാലതാമസത്തിന് കാരണം രോഹിതും വിരാടും ആണ്.
നിലവിൽ രോഹിത് ശർമ്മ, വിരാട് കോഹ്‌ലി, രവീന്ദ്ര ജഡേജ, ജസ്പ്രീത് ബുംറ തുടങ്ങിയ കളിക്കാരെ കേന്ദ്ര കരാറിന്റെ എ+ വിഭാഗത്തിൽ ആണ് ഉൾപ്പെടുത്തിയിരിക്കുന്നത്. എന്നാൽ ഇപ്പോൾ രോഹിത്, വിരാട്, ജഡേജ എന്നിവർ ടി20 ഐ ക്രിക്കറ്റിൽ നിന്ന് വിരമിച്ചു കഴിഞ്ഞിരിക്കുകയാണ്. തൽഫലമായി, പുതിയ കേന്ദ്ര കരാറിൽ ബിസിസിഐ കാര്യമായ മാറ്റങ്ങൾ വരുത്തിയേക്കാം.
എന്നിരുന്നാലും, ചില ബിസിസിഐ ഉദ്യോഗസ്ഥർ ഈ മൂന്ന് കളിക്കാരും അതെ വിഭാഗത്തിൽ തന്നെ തുടരണമെന്ന് ആഗ്രഹിക്കുന്നു, ചിലർ ഈ നിലപാടിനോട് വിയോജിക്കുന്നു. മൂന്ന് ഫോർമാറ്റുകളിലും സ്ഥിരം അംഗങ്ങളായ കളിക്കാർക്ക് മാത്രമാണ് എ+ വിഭാഗം കരാർ നൽകുന്നത് എന്നത് ശ്രദ്ധിക്കേണ്ടതാണ്. രോഹിത്, വിരാട്, ജഡേജ എന്നിവർ ഒരു ഫോർമാറ്റിൽ നിന്ന് വിരമിച്ചതിനാൽ, എ+ വിഭാഗത്തിൽ അവരുടെ സ്ഥാനത്തെക്കുറിച്ച് ചോദ്യങ്ങളുണ്ട്. എ+ വിഭാഗത്തിലെ കളിക്കാർക്ക് ബോർഡിൽ നിന്ന് പ്രതിവർഷം ₹7 കോടി രൂപ വൻ തുക ആണ് ലഭിക്കുന്നത്.
അതേസമയം ഇന്ത്യൻ പ്രീമിയർ ലീഗിലെ ആദ്യ പോരാട്ടത്തിൽ മുംബൈക്കായി രോഹിത്തിന് തിളങ്ങാൻ സാധിക്കാതെ വന്നപ്പോൾ ബാംഗ്ലൂരിനായി കോഹ്‌ലി അർദ്ധ സെഞ്ച്വറി നേടി തന്റെ കരുത്ത് കാണിച്ചു.
