വിക്കറ്റിന് മുന്നിലും പിന്നിലും സഞ്ജു സാംസണ്‍ കാഴ്ചവെക്കുന്ന പ്രകടനം ക്രിക്കറ്റ് പ്രേമികള്‍ക്ക് പ്രിയങ്കരമാണ്. എന്നാല്‍, വിക്കറ്റിന് പിന്നിലും മുന്നിലും നിന്ന് സഹകളിക്കാരെ പ്രോല്‍സാഹിപ്പിക്കുവാന്‍ സഞ്ജു പല ഭാഷകള്‍ ഉപയോഗിക്കുന്നതാണ് ഇപ്പോള്‍ കൗതുകമായിട്ടുള്ളത്.
ഡല്‍ഹിയില്‍ ബംഗ്ലാദേശുമായുള്ള രണ്ടാം ടി20 മല്‍സരത്തില്‍ വിക്കറ്റിന് പുറകില്‍ നിന്നും നാല് ഭാഷകളില്‍ സഞ്ജു ബൗളര്‍മാരുമായി ആശയ വിനിമയം നടത്തുന്നത് സ്റ്റമ്പ് ക്യാമറകള്‍ പിടിച്ചെടുത്തു. ഹിന്ദിയും ഇംഗ്ലീഷുമാണ് കൂടുതല്‍ ഉപയോഗിച്ചത്. പന്തെറിഞ്ഞ വരുണ്‍ ചക്രവര്‍ത്തിയെ സഞ്ജു തമിഴില്‍ പ്രോല്‍സാഹിപ്പിച്ചത് കൗതുകമുണര്‍ത്തി.
കമന്റേറ്റര്‍മാരായ അഭിനവ് മുകുന്ദും മുരളി കാര്‍ത്തിക്കും ഉടനേ അത് വിശേഷമാക്കി. റിയാന്‍ പരാഗ് ബൗളിങ്ങിനെത്തിയപ്പോള്‍ സഞ്ജു ഭാഷ ബംഗാളിയിലേക്ക് മാറ്റി. പരാഗിന്റെ ബോള്‍ ബംഗ്ലാദേശ് ബാറ്ററെ കുഴക്കിയപ്പോള്‍ ഹുബ് ബലോ (വളരെ നല്ലത് ) എന്ന് പറഞ്ഞാണ് സഞ്ജു പ്രോല്‍സാഹിപ്പിച്ചത്. സഞ്ജു ബംഗാളി ഭാഷയിലെ പ്രാവീണ്യം തെളിയിക്കുകയാണ് എന്ന് ഇത് കേട്ട് ഗവാസ്‌കര്‍ പറഞ്ഞതോടെ കമന്ററി ബോക്‌സില്‍ ചിരി പൊട്ടി.
ഐ പി എല്‍ മല്‍സരങ്ങളില്‍ ആര്‍ അശ്വിനുമായി സഞ്ജു തമിഴ് പേശുന്നത് സ്റ്റമ്പ് ക്യാമറകള്‍ വഴി പലപ്പോഴും കേള്‍ക്കാം. ഐ പി എല്‍ മല്‍സരത്തില്‍ തന്നെ ഫീല്‍ഡിങ്ങിനിടയില്‍ ദേവദത്ത് പടിക്കലിനോട് ‘ എടാ നീ ഇറങ്ങി നിന്നോ ‘ എന്ന് രാജസ്ഥാന്‍ റോയല്‍സ് ക്യാപ്റ്റനായ സഞ്ജു പറയുന്നതും കേട്ടിരുന്നു.
ഒരു രഞ്ജി ട്രോഫി മത്സരത്തിനിടെ ബൗളര്‍ പന്തറിയാന്‍ താമസിച്ചപ്പോള്‍ ‘ജാഡ കാണിക്കുന്നത് കണ്ടില്ലേ ഞാന്‍ ഒന്ന് കൊടുക്കട്ടെ’എന്ന് സഞ്ജു നോണ്‍ സ്‌ട്രൈക്കര്‍ ഭാഗത്ത് നില്‍ക്കുന്ന ബാറ്ററോട് പറയുന്ന വീഡിയോയും വൈറലായിരുന്നു. ചേട്ടാ എന്നാണ് പല ഇന്ത്യന്‍ ക്രിക്കറ്റ് താരങ്ങളും സഞ്ജുവിനെ വിളിക്കുന്ന പേര്.
എഴുത്ത്: മധുലാല്‍ ജയദേവന്‍
കടപ്പാട്: മലയാളി ക്രിക്കറ്റ് സോണ്‍