ഇന്ത്യയ്ക്കെതിരായ ഗാബയില്‍ നടക്കാനിരിക്കുന്ന ബോര്‍ഡര്‍-ഗവാസ്‌കര്‍ ട്രോഫിയിലെ മൂന്നാം ടെസ്റ്റില്‍ ഓസ്ട്രേലിയയെ വിജയികളായി പ്രഖ്യാപിച്ച് മുന്‍ താരങ്ങളായ മാത്യു ഹെയ്ഡനും ആദം ഗില്‍ക്രിസ്റ്റും. ആദ്യ ടെസ്റ്റില്‍ 295 റണ്‍സിന്റെ തോല്‍വി ഏറ്റുവാങ്ങിയ ഓസ്ട്രേലിയ വലിയ തിരിച്ചുവരവ് നടത്തി അഡ്ലെയ്ഡ് ഓവലില്‍ നടന്ന പിങ്ക് ബോള്‍ ടെസ്റ്റില്‍ 10 വിക്കറ്റിന്റെ വിജയം രേഖപ്പെടുത്തി.
ബ്രിസ്ബേനില്‍ പേസും ബൗണ്‍സും കൈകാര്യം ചെയ്യാന്‍ ഇന്ത്യ പാടുപെടുമെന്ന് ഹെയ്ഡന്‍ പറഞ്ഞു. വിക്കറ്റിന്റെ വേഗത്തിലും ബൗണ്‍സിലും ഇന്ത്യന്‍ ബാറ്റര്‍മാര്‍ വീണ്ടും ബുദ്ധിമുട്ടുന്നതിനാല്‍ ഞാന്‍ ഓസ്ട്രേലിയയ്ക്ക് ഒപ്പം പോകുന്നു. ഓസ്ട്രേലിയ ഇന്ത്യയെ തോല്‍പ്പിക്കുന്ന മത്സരമായിരിക്കും ഇതെന്ന് ഞാന്‍ കരുതുന്നു, ”അദ്ദേഹം പറഞ്ഞു.
ഗില്‍ക്രിസ്റ്റിനും ഇതേ വീക്ഷണമുണ്ട്. മാര്‍നസ് ലബുഷെയ്ന്‍ സെഞ്ച്വറി നേടുമെന്നും ഓസ്ട്രേലിയ പരമ്പരയില്‍ 2-1ന് മുന്നിലെത്തുമെന്നും അദ്ദേഹം പറഞ്ഞു.
കഴിഞ്ഞ പരമ്പരയില്‍ ഇരുടീമുകളും ഇവിടെ കളിച്ചപ്പോള്‍ ഇന്ത്യ ഓസ്ട്രേലിയയെ പരാജയപ്പെടുത്തിയിരുന്നു. ഓസ്ട്രേലിയ അന്ന് ഒന്നാം ഇന്നിംഗ്സില്‍ 369 റണ്‍സെടുത്തപ്പോള്‍ ഇന്ത്യ 336 റണ്‍സിന് പുറത്തായി.
സന്ദര്‍ശകര്‍ക്ക് 328 റണ്‍സ് വിജയലക്ഷ്യവുമായി ഓസ്ട്രേലിയ തങ്ങളുടെ രണ്ടാം ഇന്നിംഗ്സില്‍ 294 റണ്‍സ് നേടി. ശുഭ്മാന്‍ ഗില്‍ (91), ചേതേശ്വര്‍ പൂജാര (56), ഋഷഭ് പന്ത് (89*) എന്നിവര്‍ ഇന്ത്യയെ മൂന്ന് വിക്കറ്റിന് വിജയത്തിലേക്ക് നയിച്ചു.