ഇന്ത്യ ഓസ്‌ട്രേലിയ തമ്മിലുള്ള ബോഡർ ഗവാസ്കർ ട്രോഫി ആരംഭിക്കാനിരിക്കെ സർഫ്രാസ് ഖാന് പിന്തുണയുമായി രംഗത്ത് എത്തിയിരിക്കുകയാണ് മുൻ ഇന്ത്യൻ നായകനായ സൗരവ് ഗാംഗുലി. ന്യുസിലാൻഡുമായുള്ള പരമ്പരയിൽ ഇന്ത്യൻ മിഡിൽ ഓർഡർ ബാറ്റ്‌സ്മാനായ സർഫ്രാസിന് വേണ്ട പോലെ തിളങ്ങാൻ സാധിച്ചിരുന്നില്ല.
ന്യുസിലാൻഡിനെതിരെ നടന്ന ആദ്യ ടെസ്റ്റ് മത്സരത്തിലെ രണ്ടാം ഇന്നിങ്സിൽ സെഞ്ച്വറി നേടിയ താരത്തിന് ആ മികവ് ബാക്കിയുള്ള ടെസ്റ്റ് മത്സരങ്ങളിൽ നടത്താൻ സാധിക്കാതെ പോവുകയായിരുന്നു. ഇതോടെ താരത്തിനും നേരെ ഒരുപാട് വിമർശനങ്ങൾ ഉയർന്നു. ബോർഡർ ഗവാസ്കർ ട്രോഫിയിൽ നിന്നും താരത്തിനെ പുറത്താക്കണം എന്നുള്ള വിമർശനമാണ് ഉയർന്നു വരുന്നത്. സർഫ്രാസ് ഖാനെ പിന്തുണച്ച് രംഗത്ത് എത്തിയിരിക്കുകയാണ് സൗരവ് ഗാംഗുലി ഇപ്പോൾ.
സൗരവ് ഗാംഗുലി പറയുന്നത് ഇങ്ങനെ:
“സര്‍ഫറാസിന്റെ പ്രകടനത്തെ കുറിച്ച് അറിയണമെങ്കില്‍ അദ്ദേഹത്തിന് അവസരം നല്‍കണം. അവസരം നല്‍കാതെ ഒരു കളിക്കാരനെ കുറിച്ച് എങ്ങനെയാണ് നിങ്ങള്‍ക്ക് എന്തെങ്കിലും പറയാന്‍ കഴിയുക? അദ്ദേഹം ആദ്യം പരാജയപ്പെടട്ടെ, എന്നിട്ട് തള്ളിപ്പറയാം. ആഭ്യന്തരക്രിക്കറ്റില്‍ ഒരുപാട് റണ്‍സ് അടിച്ചുകൂട്ടിയാണ് സര്‍ഫറാസ് ഇന്ത്യന്‍ ടീമില്‍ സ്ഥാനം നേടിയെടുത്തത്. അത് ആരും അവന് കൊടുത്തതല്ല. അതുകൊണ്ട് അവസരം നല്‍കുന്നതിന് മുന്‍പ് സര്‍ഫറാസിനെ എഴുതിത്തള്ളരുത്.
സൗരവ് ഗാംഗുലി തുടർന്നു:
“സര്‍ഫറാസ് മികച്ച പ്രകടനമാണോ മോശം പ്രകടനമാണോ കാഴ്ചവെക്കുന്നതെന്ന് അറിയണമെങ്കില്‍ നിങ്ങള്‍ അവന് ഒരു അവസരം തീര്‍ച്ചയായും നല്‍കണം. അങ്ങനെ ചെയ്യാതെ അവനെ വെറുതെ വിലയിരുത്തരുത്” സൗരവ് ഗാംഗുലി പറഞ്ഞു.