ബോര്‍ഡര്‍-ഗവാസ്‌കര്‍ ട്രോഫിയില്‍ ഓസ്ട്രേലിയ ഏറ്റവുമധികം ഭയപ്പെടുന്ന ഇന്ത്യന്‍ താരം ആരാണെന്നു വെളിപ്പെടുത്തി ഓസീസ് ക്യാപ്റ്റന്‍ പാറ്റ് കമ്മിന്‍സ്. ഇന്ത്യന്‍ പേസ് ബോളിംഗിന്റെ കുന്തമുനയായ ജസ്പ്രീത് ബുംറയെയാണ് തങ്ങള്‍ ഏറ്റവുമധികം ഭയപ്പെടുന്നതെന്ന് കമ്മിന്‍സ് പറഞ്ഞു.
ഞാന്‍ ജസ്പ്രീത് ബുംറയുടെ വലിയൊരു ഫാനാണ്. അദ്ദേഹം ഒരു അതിശയിപ്പിക്കുന്ന ബോളറാണ്. വരാനിരിക്കുന്ന ബോര്‍ഡര്‍-ഗവാസ്‌കര്‍ ട്രോഫിയില്‍ ബുംറയെ നിശബ്ദനാക്കി നിര്‍ത്താന്‍ സാധിക്കുകയാണെങ്കില്‍ മാത്രമേ ഞങ്ങള്‍ക്കു പരമ്പര ജയിക്കാന്‍ സാധിക്കു.
ബുംറയ്ക്കൊപ്പം വേറെയും ചില കളിക്കാരുണ്ട്. അവര്‍ ഓസ്ട്രേലിയയില്‍ അധികം കളിക്കുകയും ചെയ്തിട്ടില്ല. ഞങ്ങള്‍ അവരുടെയൊന്നും പ്രകടനം ഒരുപാട് കാണുകയും ചെയ്തിട്ടില്ല. എങ്ങനെയായിരിക്കും ടെസ്റ്റ് പരമ്പരയില്‍ കാര്യങ്ങള്‍ വരികയെന്നു നമുക്കു നോക്കാം- കമ്മിന്‍സ് വ്യക്തമാക്കി.
ഇന്ത്യയുമായുള്ള അവസാനത്തെ രണ്ടു ടെസ്റ്റ് പരമ്പരകളും ഒരുപാട് മുമ്പായിരുന്നു. ഞങ്ങള്‍ അവയില്‍ നിന്നെല്ലാം കരകയറിക്കഴിഞ്ഞു. ഞാനൊരിക്കലും രോഹിത് ശര്‍മയോടൊപ്പം ഐപിഎല്ലില്‍ കളിച്ചിട്ടില്ല. അതുകൊണ്ടു തന്നെ അദ്ദേഹത്തെ എനിക്കു അത്ര നന്നായിട്ട് അറിയുകയുമില്ല. എങ്കിലും വളരെയധികം സംഘടിതമായ, നന്നായി പ്ലാന്‍ ചെയ്തിട്ടുള്ള ടീമായാണ് ഇന്ത്യ കാണപ്പെടുന്നത്- കമ്മിന്‍സ് കൂട്ടിച്ചേര്‍ത്തു.