ഓസ്‌ട്രേലിയയില്‍ ഇന്ത്യന്‍ ടീമിന് കാര്യങ്ങള്‍ അത്ര ശുഭകരമല്ല. പെര്‍ത്തില്‍ നടന്ന ഇന്‍ട്രാ സ്‌ക്വാഡ് മത്സരത്തിനിടെ സൂപ്പര്‍ ബാറ്റര്‍ കെഎല്‍ രാഹുലിന് പരിക്കേറ്റു. കൈമുട്ടിന് പരിക്കേറ്റ താരം ഗ്രൗണ്ട് വിട്ടു.
ബോര്‍ഡര്‍-ഗവാസ്‌കര്‍ ട്രോഫിയിലെ ആദ്യ ടെസ്റ്റില്‍ രോഹിത്തിന് പകരക്കാരനായി യശ്വസി ജയ്സ്വാളിനൊപ്പം ഇന്നിംഗ്‌സ് ഓപ്പണ്‍ ചെയ്യാനുള്ള മുന്‍നിര റണ്ണറാണ് അദ്ദേഹം. വ്യക്തിപരമായ കാരണങ്ങളാല്‍ ക്യാപ്റ്റന്‍ രോഹിത് ശര്‍മ്മ ആദ്യ മത്സരത്തില്‍നിന്ന് വിട്ടുനില്‍ക്കുകയാണ്.
ടെസ്റ്റ് ക്രിക്കറ്റില്‍ മോശം ഘട്ടത്തിലൂടെ കടന്നുപോകുന്ന രാഹുലിന് ഓസ്ട്രേലിയ എയ്ക്കെതിരായ ഇന്ത്യ എയുടെ രണ്ടാം അനൗദ്യോഗിക ടെസ്റ്റില്‍ റണ്‍സ് നേടാനായില്ല. ന്യൂസിലന്‍ഡിനെതിരെ ബെംഗളൂരുവില്‍ നടന്ന ആദ്യ ടെസ്റ്റില്‍ കളിച്ചെങ്കിലും മോശം പ്രകടനം കാരണം ബാക്കിയുള്ള മത്സരങ്ങളില്‍ രാഹുലിന് ബെഞ്ചില്‍ സ്ഥാനം ലഭിച്ചു.
ഈ മാസം 22 ന് പെര്‍ത്തില്‍ തുടങ്ങുന്ന പോരാട്ടത്തോടെ ബോര്‍ഡര്‍ ഗവാസ്‌കര്‍ ട്രോഫിയ്ക്ക് തുടക്കമാകും. ഹാട്രിക് പരമ്പര നേട്ടം ലക്ഷ്യം വെച്ചാണ് ഇന്ത്യ ഇറങ്ങുന്നത്.