ബോര്‍ഡര്‍-ഗവാസ്‌കര്‍ ട്രോഫിയില്‍ കളിയുടെ ഫലം നിര്‍ണ്ണയിക്കുക ഇന്ത്യന്‍ ബോളര്‍മാരായ രവിചന്ദ്രന്‍ അശ്വിനും രവീന്ദ്ര ജഡേജയുമായിരിക്കുമെന്ന് ഓസ്ട്രേലിയന്‍ ഓള്‍റൗണ്ടര്‍ ഗ്ലെന്‍ മാക്‌സ്‌വെല്‍. ഓസ്ട്രേലിയന്‍ ബാറ്റര്‍മാര്‍ സ്പിന്‍ കളിക്കുന്നതില്‍ അത്ര പ്രാവീണ്യമുള്ളവരല്ലെന്ന് ചൂണ്ടിക്കാട്ടിയ താരം അത് ഇന്ത്യയുടെ സ്പിന്‍ ജോഡിക്ക് ഒരു മുന്‍തൂക്കം നല്‍കിയേക്കാമെന്ന് അഭിപ്രായപ്പെട്ടു.
ദീര്‍ഘകാലമായി അശ്വിനെയും ജഡേജയെയും പോലുള്ളവര്‍ക്കെതിരെ കളിച്ചിട്ടുണ്ട്. അവര്‍ രണ്ടുപേരും എല്ലായ്‌പ്പോഴും ഞങ്ങള്‍ സ്ഥിരമായി നേരിട്ടവരാണ്. അവരുമായി ഞങ്ങള്‍ നടത്തിയ പോരാട്ടങ്ങളില്‍ പലപ്പോഴും അവര്‍ കളിയുടെ ഫലം നിര്‍ണ്ണയിക്കുന്നു- മാക്‌സ്‌വെല്‍ പറഞ്ഞു.
2018-19, 2020-21 പര്യടനങ്ങളില്‍ ഇതിഹാസ വിജയങ്ങള്‍ കൊയ്തതിന് ശേഷം തുടര്‍ച്ചയായ മൂന്നാം പരമ്പര വിജയമാണ് ഇന്ത്യ ഓസ്‌ട്രേലിയയില്‍ ലക്ഷ്യമിടുന്നത്. ടെസ്റ്റ് പരമ്പരയില്‍ ഓസ്ട്രേലിയയെ അവരുടെ തട്ടകത്തില്‍ പരാജയപ്പെടുത്തിയ ഏക ഏഷ്യന്‍ രാജ്യം ഇന്ത്യയാണ്. ദക്ഷിണാഫ്രിക്കയും ഇംഗ്ലണ്ടും ഈ നേട്ടം കൈവരിച്ചിട്ടുണ്ട്.
അശ്വിന്‍-ജഡേജ സഖ്യം 330 ഇന്നിംഗ്സുകളില്‍ നിന്ന് 50 അഞ്ച് വിക്കറ്റ് നേട്ടം സഹിതം 821 വിക്കറ്റുകള്‍ നേടിയിട്ടുണ്ട്. നവംബര്‍ 22 മുതല്‍ പെര്‍ത്തിലാണ് ഓസ്ട്രേലിയക്കെതിരെയായ ഇന്ത്യയുടെ ടെസ്റ്റ് പരമ്പര ആരംഭിക്കുന്നത്.