ഇന്ത്യൻ പ്രീമിയർ ലീഗ് (ഐപിഎൽ) 2025 മെഗാ ലേലത്തിൽ ലേലം നടത്തിപ്പുകാരിയായ മല്ലിക സാഗറിന് ഇന്നലെ അത്ര നല്ല ദിവസം ആയിരുന്നില്ല എന്ന് പറയാം. മല്ലിക സാഗർ വരുത്തിയ രണ്ട് പിഴവുകൾ ഗുജറാത്ത് ടൈറ്റൻസും (ജിടി), സൺറൈസേഴ്സ് ഹൈദരാബാദും (എസ്ആർഎച്ച്) ലേലത്തിൽ വമ്പൻ നഷ്ടങ്ങൾ വരുത്തി.
2024 പതിപ്പിൽ ഇന്ത്യൻ പ്രീമിയർ ലീഗിൻ്റെ ചരിത്രത്തിലെ ആദ്യത്തെ വനിതാ ഓക്ഷണർ ആയി മല്ലിക സാഗർ മാറിയിരുന്നു. ശേഷം ഈ സീസണിലേക്കും മല്ലികയെ നിലനിർത്തുക ആയിരുന്നു. സൗദി അറേബ്യയിലെ ജിദ്ദയിൽ നടന്നുകൊണ്ടിരിക്കുന്ന ലേലത്തിൽ അവൾക്ക് ചില വലിയ പിഴവുകൾ സംഭവിച്ചു, ആരാധകർ സോഷ്യൽ മീഡിയ വഴി ആ നിരാശ പ്രകടിപ്പിച്ചു.
മല്ലിക സാഗർ ചെയ്ത ഏറ്റവും വലിയ അബദ്ധം ജോസ് ബട്ട്‌ലറുടെ കാര്യത്തിലാണ് സംഭവിച്ചത്. രാജസ്ഥാൻ റോയൽസ്, ഗുജറാത്ത് ടൈറ്റൻസ്, ലഖ്‌നൗ സൂപ്പർ ജയൻ്റ്‌സ് എന്നിവർ തമ്മിലുള്ള ലേല പോരാട്ടത്തിനൊടുവിൽ 15.75 കോടി രൂപയ്ക്ക് ഗുജറാത്ത് ടൈറ്റൻസ് സ്റ്റാർ ഇംഗ്ലണ്ട് വിക്കറ്റ് കീപ്പർ ബാറ്റ്‌സ്മാനെ സ്വന്തമാക്കി.
എന്നിരുന്നാലും, മല്ലിക സാഗർ ഒരു പിഴവ് വരുത്തിയില്ലെങ്കിൽ, ഗുജറാത്ത് ടൈറ്റൻസിന് ബട്ട്‌ലറിന് 25 ലക്ഷം രൂപ കുറച്ച് മാത്രം നൽകിയാൽ മതിയായിരുന്നു. ടൈറ്റൻസ് 15.50 കോടി രൂപക്ക് ബിഡ് പറഞ്ഞ് നിൽക്കുന്ന സമയത്ത് മല്ലിക നിങ്ങൾക്ക് കൂടുതൽ തുകക്ക് താത്പര്യമുണ്ടോ എന്ന് ലക്നൗവിനോട് ചോദിക്കുന്നു. സൂപ്പർ ജയൻറ്സ് തങ്ങൾക്ക് താത്പര്യമില്ല എന്ന മറുപടിയാണ് നൽകിയത്. എന്നാൽ 15.50 കോടിക്ക് പകരം 15.75 കോടി എന്ന തെറ്റായ തുകയാണ് ശേഷം മല്ലിക പറഞ്ഞതും, ആ തുകക്ക് ഗുജറാത്തിന് കൈമാറുകയും ചെയ്തു.
ശേഷം മല്ലിക സാഗർ വരുത്തിയ മറ്റൊരു പ്രധാന അബദ്ധം അഭിനവ് മനോഹറിൻ്റെ കാര്യത്തിലായിരുന്നു. 30 ലക്ഷം രൂപ അടിസ്ഥാന വിലയിലാണ് ബാറ്റർ മെഗാ ലേലത്തിൽ പ്രവേശിച്ചത്. ആർസിബി, ചെന്നൈ ടീമുകളാണ് ബിഡിങ് ആരംഭിച്ചതെങ്കിലും ശേഷം ആർസിബി ഒഴിവായതോടെ ഗുജറാത്ത് രംഗത്ത് എത്തി.
2.40 കോടി രൂപയിൽ താരത്തിന്റെ വില എത്തിയതോടെ ഗുജറാത്ത് പിന്മാറുകയും സൺറൈസേഴ്സ് ഹൈദരാബാദ് ലേലത്തിൽ ചേരുകയും ലേലം 2.80 കോടി രൂപയിലെത്തിയതോടെ സിഎസ്‌കെയും പിന്മാറ്റം അറിയിച്ചു. അതോടെ ഈ തുകക്ക് ഹൈദരാബാദിന് താരത്തെ ടീമിൽ എത്തിക്കാമായിരുന്നു.
എന്നിരുന്നാലും, കൊൽക്കത്ത നൈറ്റ് റൈഡേഴ്‌സ് ബിഡ് ചെയ്തായിരുന്നു എന്നും താൻ അത് കണ്ടില്ലായിരുന്നു എന്നും പറഞ്ഞ മല്ലിക വീണ്ടും ലേലം തുടർന്നു. അതോടെ അധികമായി 40 ലക്ഷം രൂപ കൂടി താരത്തിനായി ഹൈദരാബാദ് ചിലവാക്കുകയും ചെയ്തു.