ഐപിഎല്‍ 15ാം സീസണില്‍ രാജസ്ഥാന്‍ റോയല്‍സിനെ മികച്ച രീതിയില്‍ മുന്നോട്ടു നയിക്കുന്ന സഞ്ജു സാംസണെ പ്രശംസിച്ച് കേരള ക്രിക്കറ്റ് ടീം ക്യാപ്റ്റന്‍ സച്ചിന്‍ ബേബി. സഞ്ജു ഐപിഎല്‍ നായകനായത് കേരള ക്രിക്കറ്റ് ടീമിനും വളരെ പ്രചോദനം നല്‍കുന്നതാണെന്നും അവന്റെ പ്രകടനം സന്തോഷിപ്പിക്കുന്നു എന്നും സച്ചിന്‍ പറഞ്ഞു.
‘സഞ്ജു സാംസണ്‍ ഐപിഎല്ലില്‍ മികച്ച പ്രകടനമാണ് കാഴ്ചവെക്കുന്നത്. അവന്‍ നന്നായി സ്‌കോര്‍ നേടുന്നു. ക്യാപ്റ്റന്‍സി അത്ര എളുപ്പമുള്ള ജോലിയല്ല. നിരവധി പ്രശംസകളും അതോടൊപ്പം വിമര്‍ശനങ്ങളും ക്യാപ്റ്റനെ തേടിയെത്തും.’
‘എനിക്കിത് കൃത്യമായി മനസിലാക്കും. കാരണം ഞാന്‍ അവസ്ഥകളിലൂടെയെല്ലാം കടന്ന് പോയവനാണ്. അവനെയോര്‍ത്ത് സന്തോഷിക്കുന്നു. സഞ്ജു ഐപിഎല്‍ നായകനായത് കേരള ക്രിക്കറ്റ് ടീമിനും വളരെ പ്രചോദനം നല്‍കുന്നതാണ്’ സച്ചിന്‍ ബേബി പറഞ്ഞു.
2021ലാണ് സഞ്ജു സാംസണ്‍ രാജസ്ഥാന്‍ റോയല്‍സിന്റെ നായകനാവുന്നത്. സ്റ്റീവ് സ്മിത്തിനെ ഒഴിവാക്കിയാണ് രാജസ്ഥാന്‍ സഞ്ജുവിനെ തല്‍സ്ഥാനത്തെത്തിക്കുന്നത്. ഈ സീസണില്‍ എട്ട് മത്സരത്തില്‍ നിന്ന് ആറ് ജയവും രണ്ട് തോല്‍വിയുമടക്കം 12 പോയിന്റുമായി രാജസ്ഥാന്‍ രണ്ടാം സ്ഥാനത്തുണ്ട്.