2025ല്‍ പാകിസ്ഥാനില്‍ നടക്കുന്ന ഐസിസി ചാമ്പ്യന്‍സ് ട്രോഫിയില്‍ കളിക്കാന്‍ വിസമ്മതിച്ചതിന് ഇന്ത്യയെ രൂക്ഷമായി വിമര്‍ശിച്ച് പാക് പേസര്‍ മുഹമ്മദ് ആമിര്‍. അയല്‍രാജ്യത്ത് കളിക്കാന്‍ ഇന്ത്യന്‍ സര്‍ക്കാരില്‍ നിന്ന് അനുമതി ലഭിച്ചിട്ടില്ലെന്ന് ബിസിസിഐ ഐസിസിയെ കഴിഞ്ഞ ദിവസം അറിയിച്ചിരുന്നു. ഈ നിലപാട് 2008 മുതല്‍ നിലവിലുണ്ട്. മൂന്ന് തവണ പാകിസ്ഥാന്‍ ഇന്ത്യയിലേക്ക് വന്നിട്ടും, ഇന്ത്യ അേേങ്ങാട്ട് പോകുന്നതിനോട് അനുകൂലമല്ല.
ഇത് ക്രിക്കറ്റിന്റെ നഷ്ടമാണ്, ഇത് സംഭവിക്കേണ്ടതല്ല. ഒരു ടീം കാരണം മറ്റ് ടീമുകളെ കഷ്ടപ്പെടാന്‍ അനുവദിക്കരുത്. ഇന്ത്യയെ ടൂര്‍ണമെന്റില്‍ നിന്ന് പുറത്താക്കി അവരുടെ സ്ഥാനത്ത് മറ്റൊരു ടീമിനെ ഉള്‍പ്പെടുത്തുന്നത് നല്ലതാണ്. മറ്റ് ടീമുകള്‍ ഇവിടെ മത്സരിക്കാന്‍ തയ്യാറായിരിക്കുമ്പോള്‍ പാകിസ്ഥാനില്‍ കളിക്കാന്‍ ഇന്ത്യ വിസമ്മതിക്കുന്നത് മോശമാണ്.
ഐസിസിക്ക് ക്രിക്കറ്റ് കാര്യങ്ങളില്‍ ഇടപെടുന്ന അവരുടെ സര്‍ക്കാരിന്റെ അംഗ ബോര്‍ഡിനെതിരെ കടുത്ത നടപടി സ്വീകരിക്കുന്നതിന് അധികാരം ഉള്ള ഒരു നിയമം ഉണ്ടായിരിക്കണം. മോഹ്‌സിന്‍ നഖ്വി രാജ്യത്തിന്റെ ആഭ്യന്തര മന്ത്രിയായതിനാല്‍ ഈ തവണ പാകിസ്ഥാന്‍ ക്രിക്കറ്റ് ബോര്‍ഡ് വഴങ്ങില്ലെന്ന് തോന്നുന്നു. സ്റ്റേഡിയങ്ങളുടെ നവീകരണത്തിന് കോടികള്‍ ചെലവഴിച്ച ശേഷം പാകിസ്ഥാന്‍ കഷ്ടപ്പെടാന്‍ അദ്ദേഹം അനുവദിക്കില്ല.
ഇന്ത്യന്‍ കളിക്കാര്‍ക്കും ആരാധകര്‍ക്കും അവരുടെ സര്‍ക്കാരിന്റെ നിലപാടിനെ കാരണം കഷ്ടപ്പെടേണ്ടിവരുന്നു. അവര്‍ക്ക് പാകിസ്ഥാനില്‍ കളിക്കാന്‍ ആഗ്രഹമുണ്ട്, പക്ഷേ അത് ചെയ്യാന്‍ അനുവദിക്കുന്നില്ല. ക്രിക്കറ്റിനെ രാഷ്ട്രീയത്തില്‍ നിന്ന് മാറ്റി നിര്‍ത്തേണ്ടതുണ്ട്- മുഹമ്മദ് ആമിര്‍ കൂട്ടിച്ചേര്‍ത്തു.