ഇന്ത്യന്‍ ക്രിക്കറ്റിനെ ദീര്‍ഘകാലമായി സേവിക്കുന്ന താരമാണ് ഓഫ് സ്പിന്‍ മാന്ത്രികന്‍ ആര്‍. അശ്വിന്‍. തമിഴ്‌നാടിനുവേണ്ടിയും ഇന്ത്യക്കായും കളിക്കുമ്പോള്‍ പല വിക്കറ്റ് കീപ്പര്‍മാരും അശ്വിന്റെ സഹ താരങ്ങളായിട്ടുണ്ട്. അവരില്‍ എം.എസ്. ധോണിയാണോ വൃദ്ധിമാന്‍ സാഹയാണോ ദിനേശ് കാര്‍ത്തിക്കാണോ കേമനെന്ന് പറയുകയാണ് അശ്വിന്‍.
ധോണി, സാഹ, കാര്‍ത്തിക്ക് എന്ന ക്രമത്തില്‍ ഞാന്‍ ഉത്തരം നല്‍കുന്നു. ഇവരെ മൂന്നുപേരെയും വേര്‍തിരിക്കുക പ്രയാസകരം. എന്നാല്‍ ധോണിയാണ് ഏറ്റവും കേമന്‍. ധോണി പിഴവ് വരുത്തുന്നത് വിരളം- അശ്വിന്‍ പറഞ്ഞു.
തമിഴ്‌നാടിനുവേണ്ടി ദിനേശ് കാര്‍ത്തിക്കിനൊപ്പം ഞാന്‍ ഒരുപാട് ക്രിക്കറ്റ് കളിച്ചിട്ടുണ്ട്. എന്നാല്‍ ഏറ്റവും മികച്ച വിക്കറ്റ് കീപ്പര്‍ ആരെന്ന ചോദിച്ചാല്‍ ധോണിയെന്നു ഞാന്‍ മറുപടി നല്‍കും. ധോണി സ്റ്റംപിന് പിന്നിലുള്ളപ്പോള്‍ പ്രയാസകരമായ പുറത്താക്കലുകള്‍പോലും അനായാസമെന്നു തോന്നിയിട്ടുണ്ട്. ചെന്നൈയിലെ ഒരു ടെസ്റ്റിന്റെ ആദ്യ ദിനത്തില്‍ എഡ് കോവനെ ഔട്ടാക്കിയത് ഓര്‍ക്കുന്നു. ക്രീസിന് പുറത്തേക്കു ചാടിയിറങ്ങിയ കോവനെ ധോണി സ്റ്റംപ് ചെയ്തു. പന്ത് ടേണ്‍ ചെയ്തിരുന്നില്ല. പക്ഷേ, ബൗണ്‍സ് ചെയ്തു. പക്ഷേ, ആ ബോള്‍ ധോണി കളക്ട് ചെയ്തു. സ്റ്റംപിംഗ് ആയാലും റണ്ണൗട്ടും ക്യാച്ചുമായാലും ധോണി പിഴവുവരുത്തുന്നത് വിരളമായേ കാണാന്‍ സാധിക്കുകയുള്ളൂവെന്നും അശ്വിന്‍ കൂട്ടിച്ചേര്‍ത്തു.