മലയാളി താരം സഞ്ജു സാംസണിനു അധികം വൈകാതെ തന്നെ ഇന്ത്യന്‍ ടീമിലെ സ്ഥിരം സാന്നിധ്യമായി തീരാന്‍ സാധിക്കുമെന്നു മുന്‍താരം മനോജ് തിവാരി. ഇന്ത്യന്‍ പരിശീലകന്‍ രാഹുല്‍ ദ്രാവിഡിന് ഏറെ ഇഷ്ടമുള്ള താരമാണ് സഞ്ജുവെന്നും അതിനാല്‍ത്തന്നെ സഞ്ജു ഇന്ത്യന്‍ ടീമില്‍ സ്ഥിരസാന്നിധ്യമാകുന്ന സമയം വിദൂരമല്ലെന്നും തിവാരി പറഞ്ഞു.
ഇന്ത്യന്‍ കോച്ച് രാഹുല്‍ ദ്രാവിഡ് ഏറെ ഇഷ്ടപ്പെടുന്ന ക്രിക്കറ്ററാണ് സഞ്ജു സാംസണ്‍. വ്യക്തിപരമായി മാത്രമല്ല സഞ്ജുവിന്റെ ഗെയിമും അദ്ദേഹം ഇഷ്ടപ്പെടുന്നു. അതിനാല്‍ തന്നെ ദേശീയ ടീമിലേക്കുള്ള വിളി അധികം വൈകില്ല. ദ്രാവിഡ് തീര്‍ച്ചയായും സഞ്ജുവിനെ പിന്തുണയ്ക്കുക തന്നെ ചെയ്യും. ഇതിനായി ഒരേയൊരു അവസരമാണ് അദ്ദേഹം തിരയുന്നത്.
ഉചിതമായ അവസരമെത്തിയാല്‍ ദ്രാവിഡിന്റെ പൂര്‍ണ പിന്തുണ സഞ്ജുവിന് ലഭിക്കും. അതു ഇന്ത്യന്‍ ടീമില്‍ അദ്ദേഹത്തിന്റെ സ്ഥാനമുറപ്പിക്കുകയും ചെയ്യും. രോഹിത്തിനെപ്പോലെ തന്നെയുള്ള കഴിവ് അദ്ദേഹത്തിനുമുണ്ട്. അതിനാല്‍ സഞ്ജുവിനെയും പിന്തുണയ്ക്കേണ്ടത് വളരെ പ്രധാനമാണ്. ഐപിഎല്ലില്‍ ഇത്തവണ ഒരു സാധാരണ പ്രകടനമല്ല, അസാധാരണ പ്രകടനം തന്നെയാണ് സഞ്ജുകാഴ്ചവയ്ക്കേണ്ടത്. എങ്കില്‍ മാത്രമല്ല ഇന്ത്യന്‍ ടീമിന്റ വാതില്‍ മുട്ടുകയല്ല, അതു തകര്‍ത്ത് അകത്തേക്കു കയറാന്‍ കഴിയൂ- മനോജ് തിവാരി പറഞ്ഞു.
ഐപിഎല്ലിനു ശേഷം വെസ്റ്റിന്‍ഡീസ് അയര്‍ലന്‍ഡ് പര്യടനങ്ങളിലാണ് ഇന്ത്യന്‍ ടീം കളിക്കുക. കൂടാതെ ഓസ്ട്രേലിയയുമായി വൈറ്റ് ബോള്‍ പരമ്പരയുമുണ്ട്. വെസ്റ്റിന്‍ഡീസ് പര്യടനത്തിനുള്ള ടീമില്‍ സഞ്ജു സാംസണിനു ഇടം ലഭിക്കുമെന്നാണ് പ്രതീക്ഷിക്കപ്പെടുന്നത്. അതിന് ഐപിഎല്ലില്‍ മികച്ച പ്രകടനം കാഴ്ചവയ്‌ക്കേണ്ടത് അത്യാവശ്യമാണ്.