ഇംഗ്ലണ്ട് താരങ്ങളായ ക്രിസ് വോക്‌സും മാര്‍ക്ക് വുഡും ഓവലില്‍ നടക്കുന്ന നാലാം ടെസ്റ്റിനുള്ള ഇംഗ്ലണ്ട് ടീമില്‍ ഇടംപിടിച്ചു. അതേസമയം ജോസ് ബട്‌ലര്‍ ഓവറില്‍ കളിക്കില്ല. പകരം സാം ബില്ലിംഗ്‌സ് ടീമിലിടം നേടി.
ക്രിസ് വോക്‌സ് ടെസ്റ്റ് ടീമില്‍ തിരിച്ചെത്തുന്നത് വളരെ സന്തോഷം നല്‍കുന്ന കാര്യമാണെന്ന് ഇംഗ്ലണ്ട് മുഖ്യ പരിശീലകന്‍ ക്രിസ് സില്‍വര്‍വുഡ് പറഞ്ഞു. പരിക്കില്‍ നിന്ന് മോചിതനായി തിരിച്ചെത്തിയ വോക്‌സ് വാര്‍വിക് ഷെയറിനൊപ്പം മികച്ച പ്രകടനമാണ് കാഴ്ചവെച്ചത്.
ബോളിംഗിന് പുറമേ മിഡില്‍ ഓര്‍ഡറില്‍ റണ്‍സ് നേടാനുള്ള വോക്‌സിന്റെ കഴിവും ഇംഗ്ലണ്ടിന് ഏറെ ഗുണകരമാകും. വുഡും വോക്‌സും ടീമിനൊപ്പം ചേര്‍ന്നത് ഇംഗ്ലണ്ടിന് നാലാം ടെസ്റ്റില്‍ ധാരാളം ബോളിംഗ് ഓപ്ഷനുകള്‍ നല്‍കും. ഇത് ഇന്ത്യയെ സംബന്ധിച്ച് ഏറെ തിരിച്ചടിയുമാകും.