മഴ രസംകൊല്ലിയായെത്തിയ ഇംഗ്ലണ്ട്- പാക് മൂന്നാം ടെസ്റ്റ് സമനിലയില്‍ പിരിഞ്ഞു. ഇതോടെ മൂന്ന് ടെസ്റ്റുകളടങ്ങിയ പരമ്പര 1-0 ന് അതിഥേയരായ ഇംഗ്ലണ്ട് സ്വന്തമാക്കി. രണ്ടാം ടെസ്റ്റും സമനിലയില്‍ പിരിഞ്ഞപ്പോള്‍ ഒന്നാം ടെസ്റ്റില്‍ ഇംഗ്ലണ്ട് ജയിച്ചിരുന്നു.
മത്സരത്തില്‍ ഫോളോഓണ്‍ നേരിട്ട പാകിസ്താന്‍ 83.1 ഓവറില്‍ നാലു വിക്കറ്റിനു 187 റണ്‍സെടുത്തു നില്‍ക്കെയാണ് ഇരുടീമുകളും കളി സമനിലയില്‍ അവസാനിപ്പിക്കാന്‍ തീരുമാനിച്ചത്. 63 റണ്‍സുമായി ബാബര്‍ അസാമും റണ്ണൊന്നുമെടുക്കാതെ ഫവാദ് ആലമായിരുന്നു ക്രീസില്‍.
ഒന്നാം ഇന്നിംഗ്‌സില്‍ പാകിസ്ഥാന്‍ 273 ന് പുറത്തായിരുന്നു. ഇതോടെ ഒന്നാം ഇന്നിംഗ്‌സില്‍ 310 റണ്‍സിന്റെ ലീഡാണ് പാക് പട വഴങ്ങിയത്. വമ്പന്‍ ലീഡ് നേടിയതോടെ ഇംഗ്ലണ്ട് സന്ദര്‍ശകരെ ഫോളോഓണിനയക്കുകയായിരുന്നു. ആദ്യ ഇന്നിംഗ്‌സില്‍ 583 ന് ഇംഗ്ലണ്ട് ഇന്നിംഗ്‌സ് ഡിക്ലയര്‍ ചെയ്തിരുന്നു.
Read more
കോവിഡ് ബ്രേക്ക് കഴിഞ്ഞ് ക്രിക്കറ്റ് പുനരാരംഭിച്ച ശേഷം ഇംഗ്ലണ്ടിന്റെ തുടര്‍ച്ചയായ രണ്ടാമത്തെ ടെസ്റ്റ് പരമ്പര വിജയമാണിത്. നേരത്തേ വെസ്റ്റ് ഇന്‍ഡീസിനെതിരായ ടെസ്റ്റ് പരമ്പരയും ഇംഗ്ലണ്ട് നേടിയിരുന്നു.
