ഇംഗ്ലണ്ടിനെതിരായ പരമ്പരയിലെ അവസാനത്തെ ക്രിക്കറ്റ് ടെസ്റ്റില്‍ തോല്‍വിയുടെ പടിവാതില്‍ക്കല്‍ നിന്നിരുന്ന വിന്‍ഡീസിനെ നാലാം ദിനം മഴ തുണച്ചെങ്കിലും അവസാനദിനം അതുണ്ടായില്ല. മഴ മാറി നിന്ന് മാനം തെളിഞ്ഞതോടെ വിന്‍ഡീസിനെ എറിഞ്ഞൊതുക്കി ഇംഗ്ലണ്ട് പരമ്പര സ്വന്തമാക്കി.
മൂന്നാം ടെസ്റ്റില്‍ വിന്‍ഡീസ് 269 റണ്‍സിന്റെ ദയനീയ തോല്‍വിയാണ് വഴങ്ങിയത്. 399 റണ്‍സ് വിജയലക്ഷ്യവുമായി ബാറ്റിങ്ങിനിറങ്ങിയ വിന്‍ഡീസ് അഞ്ചാം ദിനം വെറും 129 റണ്‍സിനു എല്ലാവരും പുറത്തായി. ഇതോടെ ഇംഗ്ലണ്ട് മൂന്ന് മത്സരങ്ങളുടെ പരമ്പര 2-1ന് സ്വന്തമാക്കി. സ്‌കോര്‍: ഇംഗ്ലണ്ട്: 369, രണ്ടിന് 226 ഡിക്ലയര്‍. വെസ്റ്റിന്‍ഡീസ്: 197,129.
അഞ്ച് വിക്കറ്റ് വീഴ്ത്തിയ ക്രിസ് വോക്സിന്റെയും നാല് വിക്കറ്റ് വീഴ്ത്തിയ സ്റ്റുവര്‍ട്ട് ബ്രോഡിന്റെയും പ്രകടനമാണ് വെസ്റ്റ് ഇന്‍ഡീസിനെ തകര്‍ത്തത്. ബ്രോഡ് ടെസ്റ്റ് കരിയറില്‍ 500 വിക്കറ്റ് എന്ന നാഴികക്കല്ലും പിന്നിട്ടു. ആദ്യ ഇന്നിംഗ്സില് ആറ് വിക്കറ്റുകളാണ് ബ്രോഡ് പിഴുതത്. ഷായ് ഹോപ്പാണ് (31) വിന്‍ഡീസ് നിരയിലെ ടോപ് സ്‌കോറര്‍.
രണ്ടാം ഇന്നിംഗ്സില് 399 റണ്‍സിന്റെ വിജയ ലക്ഷ്യം പിന്തുടര്‍ന്ന് വിന്‍ഡീസ് മൂന്നാം ദിനം കളി നിര്‍ത്തുമ്പോള്‍ രണ്ട് വിക്കറ്റ് നഷ്ടത്തില്‍ 10 റണ്‍സെന്ന നിലയിലായിരുന്നു. രണ്ടാം ഇന്നിംഗ്‌സ് രണ്ട് വിക്കറ്റ് നഷ്ടത്തില്‍ 226 എന്ന നിലയില്‍ ഇംഗ്ലണ്ട് ഡിക്ലയര്‍ ചെയ്യുകയായിരുന്നു. ആദ്യ ഇന്നിംഗ്സില് വിന്‍ഡീസ് 197 ന് എല്ലാവരും പുറത്തായിരുന്നു.