പെർത്തിലെ ഒപ്‌റ്റസ് സ്റ്റേഡിയത്തിൽ ഓസ്‌ട്രേലിയയ്‌ക്കെതിരായ ആദ്യ ടെസ്റ്റിലെ ഇന്ത്യയുടെ തകർപ്പൻ വിജയത്തിന് ശേഷം വാർത്തകളിൽ നിറഞ്ഞ് നിൽക്കുകയാണ് യുവതാരം യശസ്വി ജയ്സ്വാൾ. ആദ്യ ഇന്നിങ്സിൽ പൂജ്യനായി മടങ്ങിയ ശേഷം, രണ്ടാം ഇന്നിങ്ങ്സിൽ കണ്ടത് താരത്തിന്റെ ഒരു മാസ് തിരിച്ചുവരവായിരുന്നു. 2024-25 ലെ ബോർഡർ-ഗവാസ്‌കർ ട്രോഫിയിലെ ആദ്യ മത്സരത്തിൽ ഇന്ത്യ 295 റൺസിന് വിജയിച്ചപ്പോൾ അതിൽ ഈ യുവതാരം നൽകിയ സംഭാവന വിലമതിക്കാനാകാത്ത ഒന്നായിരുന്നു .
ഓസ്‌ട്രേലിയൻ മാധ്യമങ്ങൾ ആദ്യ മത്സരത്തിലെ പ്രകടനത്തിന് ശേഷം പുതിയ രാജാവ് എന്നാണ് താരത്തെ വിളിച്ചത്. ആദ്യമായി ഓസ്‌ട്രേലിയയിൽ കളിക്കുന്ന പരിഭ്രമം ഒന്നും കാണിക്കാതെ താരം നന്നായി കളിച്ചു. തൻ്റെ മാരത്തൺ ഇന്നിംഗ്‌സിനിടെ ഓസ്‌ട്രേലിയൻ സൂപ്പർ ബോളർ സ്റ്റാർക്കിനെ ജയ്സ്വാൾ സ്ലെഡ്ജ് ചെയ്യുകയും ചെയ്തു. തന്റെ ഏറ്റവും മികച്ച ഫോമിൽ പോലും ഓസ്‌ട്രേലിയൻ ബോളർമാർ താൻ ഒന്നും പറയില്ലായിരുന്നു എന്നും ഈ പയ്യന്റെ തന്റേടം അസാധ്യം ആണെന്നും പറഞ്ഞിരിക്കയാണ് ഇംഗ്ലണ്ട് ഇതിഹാസം അലിസ്റ്റർ കുക്ക്.
ബാറ്ററുടെ ധീരമായ മനോഭാവത്തെ കുക്ക് അഭിനന്ദിച്ചു:
“അവൻ മിച്ചൽ സ്റ്റാർക്കിനെ സ്ലെഡ്ജ് ചെയ്യുകയും അവൻ്റെ ഡെലിവറികൾ സ്ലോ ആണെന്ന് പറയുകയും ചെയ്തു. ഞാൻ സ്റ്റാർക്കിനെ നേരിട്ടിട്ടുണ്ട്, അവൻ പതുക്കെ പന്തെറിയില്ല. അവൻ പതുക്കെ പന്തെറിയുകയാണെങ്കിലും, ഞാൻ അവനോട് ഒന്നും പറയില്ല, എൻ്റെ വായ് ഞാൻ അടച്ചു വെക്കും. സ്റ്റാർക്കിനെ ഒകെ ചൊറിഞ്ഞ കുട്ടിയുടെ ധീരത സമ്മതിക്കാതെ തരമില്ല ”കുക്ക് പറഞ്ഞു.
ജയ്‌സ്വാളിനെ മികച്ച കളിക്കാരനെന്നാണ് അലസ്റ്റർ കുക്ക് വിശേഷിപ്പിച്ചത്. ഇംഗ്ലണ്ടിനെതിരായ അഞ്ച് ടെസ്റ്റുകളിൽ രണ്ട് ഇരട്ട സെഞ്ച്വറികൾ ഉൾപ്പെടെ 89 ശരാശരിയിലും 79.91 സ്‌ട്രൈക്ക് റേറ്റിലും 712 റൺസ് ജയ്സ്വാൾ നേടി.