ഊഹാപോഹങ്ങൾക്ക് വിരാമമിട്ട്, അടുത്ത മാസം കൊച്ചിയിൽ നടക്കാനിരിക്കുന്ന ഐപിഎൽ മിനി ലേലത്തിന് മുന്നോടിയായി നിലനിർത്തിയ കളിക്കാരുടെ പട്ടികയിൽ ഓൾറൗണ്ടർ രവീന്ദ്ര ജഡേജയുടെ പേര് ചെന്നൈ സൂപ്പർ കിംഗ്സ് ചൊവ്വാഴ്ച സ്ഥിരീകരിച്ചു. ഇന്നലെ ആയിരുന്നു നിലനിർത്തുന്നതും ഒഴിവാകുന്നതുമായ താരങ്ങളുടെ പട്ടിക സമർപ്പിക്കേണ്ട അവസാന തീയതി.
ഐപിഎൽ 2022 ലെ സംഭവങ്ങൾക്ക് ശേഷം ജഡേജ മറ്റൊരു ടീമിലേക്ക് മാറുമെന്ന് അഭ്യൂഹങ്ങളുണ്ടായിരുന്നു. കഴിഞ്ഞ സീസൺ ആരംഭിക്കുന്നതിന് കുറച്ച് ദിവസങ്ങൾക്ക് മുമ്പ് അദ്ദേഹത്തെ ക്യാപ്റ്റനായി നിയമിച്ചിരുന്നു. സീസൺ മോശമായതോടെ ധോണിയെ നായകനാക്കി ചെന്നൈ നിയമിക്കുക ആയിരുന്നു.
സിഎസ്‌കെയുമായി ബന്ധപ്പെട്ട തന്റെ മുൻകാല സോഷ്യൽ മീഡിയ പോസ്റ്റുകൾ ജഡേജ ഡിലീറ്റ് ചെയ്തതോടെ താരം ചെന്നൈ വിട്ടേക്കുമെന്ന് റിപോർട്ടുകൾ ശക്തമായി. എന്നാൽ പ്രശ്നങ്ങൾ എല്ലാം പരിഹരിച്ച് ചെന്നൈ താരത്തെ നിലനിർത്തിയതോടെ വിവാദങ്ങൾ അവസാനിച്ചു.
പ്രഖ്യാപനത്തിന് തൊട്ടുപിന്നാലെ, ക്യാപ്റ്റൻ ധോണിയുമായുള്ള തന്റെ ചിത്രം ട്വിറ്ററിൽ പങ്കിട്ടുകൊണ്ട് ജഡേജ തന്നെ ‘എല്ലാം ശരിയായ നടക്കുന്നു ’ എന്ന് സ്ഥിരീകരിച്ചു. ഇതോടെ ചെന്നൈ ആരാധകർക്ക് ആഘോഷത്തിന്റെ സമയമായി.