ഇപ്പോൾ നടന്ന മെഗാ താരലേലത്തിൽ ഭേദപ്പെട്ട ടീമിനെ സജ്ജമാക്കാനേ റോയൽ ചലഞ്ചേഴ്സ് ബെംഗളുരുവിന് സാധിച്ചുള്ളൂ. ആരാധകരെ ഞെട്ടിച്ച തീരുമാനം, 2021 മുതൽ ആർസിബി നായകനായ ഫാഫ് ഡു പ്ലെസിയെ ഇത്തവണത്തെ റീടെൻഷനിലോ, മെഗാ താരലേലത്തിലോ ടീമിൽ എടുക്കാൻ അധികൃതർ തയ്യാറാകാത്തതായിരുന്നു. സീസണിൽ ഉടനീളം മികച്ച പ്രകടനം കാഴ്ച വെച്ച താരമായിരുന്നു അദ്ദേഹം. എന്നിട്ടും ടീം താരത്തിനെ നിലനിർത്താൻ കൂട്ടാക്കാത്തത് ആരാധകരെ ഞെട്ടിച്ചിരുന്നു.
എന്നാൽ ടീം മാനേജ്‌മന്റ് എന്ത് കൊണ്ടാണ് ഫാഫ് ഡു പ്ലെസിയെ നിലനിർത്താത്തത് എന്ന് പറഞ്ഞു കൊണ്ട് രംഗത്ത് എത്തിയിരിക്കുകയാണ് റോയൽ ചലഞ്ചേഴ്സ് ബെംഗളൂരു അധികൃതർ.
സോഷ്യൽ മീഡിയ പോസ്റ്റിൽ ആർസിബി രേഖപ്പെടുത്തുന്നത് ഇങ്ങനെ:
“ഒരു വിദേശ ഓപണിങ് ബാറ്ററെ റോയൽ ചലഞ്ചേഴ്സിന് ആവശ്യമായിരുന്നു. മികച്ച ഫോമിലുള്ള ദിവസം അവർക്ക് 60, 50 അല്ലെങ്കിൽ 40 പന്തിൽ സെഞ്ച്വറി നേടാൻ കഴിയും. ജോസ് ബട്ലറും ഫിൽ സോൾട്ടും ഇത് പലതവണ നേടിയിട്ടുണ്ട്. ഫാഫ് ഡു പ്ലെസിയുടെ പ്രായം പരിഗണിച്ചാണ് മറ്റൊരു താരത്തെ കണ്ടെത്തിയത്” റോയൽ ചലഞ്ചേഴ്സ് ടീം അധികൃതർ പറഞ്ഞു.
അടുത്ത ഐപിഎലിൽ നായക സ്ഥാനത്ത് ഉണ്ടാവുക വിരാട് കോഹ്ലി ആയിരിക്കും എന്നാണ് ഇപ്പോൾ ലഭിക്കുന്ന റിപ്പോട്ടുകൾ സൂചിപ്പിക്കുന്നത്. എന്നാൽ ഔദ്യോഗീകമായ പ്രഖ്യാപനങ്ങൾ ടീം മാനേജ്‌മന്റ് പുറത്ത് വിട്ടിട്ടില്ല. അന്താരാഷ്ട്ര തലത്തിൽ ടി-20 യിൽ നിന്ന് അദ്ദേഹം വിരമിച്ചത് കൊണ്ട് ആർസിബി ക്യാപ്റ്റൻ സ്ഥാനം വിരാട് കോഹ്ലി ഏറ്റെടുക്കുമോ എന്നാണ് ആരാധകരുടെ ചോദ്യം.