നിര്‍ണ്ണായക മാറ്റങ്ങളോടെ കേരളം; സൂപ്പര്‍ താരം പുറത്ത്

ഹരിയാനയ്‌ക്കെതിരെ നിര്‍ണായക രഞ്ജി ട്രോഫി മത്സരത്തില്‍ കേരളത്തിന് ബൗളിംഗ്. ടോസ് നേടിയ ഹരിയാന നായകന്‍ അമിത് മിശ്ര ബാറ്റിംഗ് തെരഞ്ഞെടുക്കുകയായിരുന്നു. ഹരിയാനയിലെ റോത്തക്കിലാണ് മത്സരം നടക്കുന്നത്.

ടീമിലെ സ്റ്റാര്‍ സ്പിന്നര്‍ സിജുമോന്‍ ജോസഫിന് പകരം പേസ് ബൗളര്‍ എംഡി നിതീഷിനെയാണ് കേരളം പ്ലെയിംഗ് ഇലവനില്‍ ഉള്‍പ്പെടുത്തിയത്. ഫാസ്റ്റ് ബൗളര്‍മാരെ തുണയ്ക്കുന്ന പിച്ചാണ് ഇവിടുത്തേത് എന്നതിനാവാണ് നിതീതീഷിനെ ടീമില്‍ ഉള്‍പ്പെടുത്തിയത്.

സൂപ്പര്‍ താരം സഞ്ജു സാംസണ്‍ വിക്കറ്റ് കീപ്പറുടെ റോള്‍ കൂടി വഹിക്കുന്നുണ്ട്. രഞ്ജിയില്‍ നോക്കൗട്ട് സാധ്യയുളളതിനാല്‍ എന്ത് വിലകൊടുത്തും മത്സരം വിജയിക്കാനാണ് കേരളം ശ്രമിക്കുക.

അഞ്ച് മത്സരങ്ങളില്‍ നാല് വിജയവും ഒരു പരാജയവുമായി കേരളം ഗ്രൂപ്പില്‍ രണ്ടാം സ്ഥാനത്താണ്. കേരളത്തിന് 24 പോയിന്റുണ്ട്. ഗുജറാത്താണ് ഒന്നാമത്. സൗരാഷ്ട്ര മൂന്നാമതുണ്ട്. കഴിഞ്ഞ അഞ്ച് മത്സരങ്ങളില്‍ നിന്നും ഒമ്പതു പോയിന്റുമായി ഹരിയാന ഗ്രൂപ്പില്‍ അഞ്ചാം സ്ഥാനത്താണ്. ഈ മത്സരത്തില്‍ വിജയിച്ചാല്‍ കേരളത്തിനു നോക്കൗട്ടിലെത്താം.

നേരത്തെ, രാജസ്ഥാന്‍, ജാര്‍ഖണ്ഡ്, ജമ്മുകാഷ്മീര്‍, സൗരാഷ്ട്ര എന്നീ ടീമുകളെ കേരളം പരാജയപ്പെടുത്തിയപ്പോള്‍ മുന്‍ ചാമ്പ്യന്മാരായ ഗുജറാത്തിനോടു കേരളം പരാജയപ്പെടുകയായിരുന്നു.