ഓസ്‌ട്രേലിയക്കെതിരായ ട്വന്റി20 ലോക കപ്പ് ക്രിക്കറ്റ് സന്നാഹ മത്സരത്തില്‍ ന്യൂസിലന്‍ഡിന്റെ മാര്‍ട്ടിന്‍ ഗുപ്റ്റില്‍ എടുത്ത ഉശിരന്‍ ക്യാച്ചിന് ആരാധകരുടെ കൈയടി. ഓസീസ് ഓപ്പണര്‍ ഡേവിഡ് വാര്‍ണറെ പുറത്താക്കാന്‍ പന്ത് പറന്നു പിടിക്കുകയായിരുന്നു ഗുപ്റ്റില്‍.
ഓസ്‌ട്രേലിയന്‍ ഇന്നിംഗ്‌സിന്റെ ആദ്യ പന്തിലാണ് ഗുപ്റ്റിലിന്റെ ത്രസിപ്പിക്കുന്ന ക്യാച്ച്.ഓഫ് സ്റ്റംപിന് പുറത്തേക്കുപോയ ടീം സൗത്തിയുടെ പന്തില്‍ ഡ്രൈവ് കളിച്ച വാര്‍ണറുടെ കണക്കു കൂട്ടല്‍ തെറ്റി. ബാറ്റിന്റെ ഔട്ട്‌സൈഡ് എഡ്ജില്‍ കൊണ്ട പന്ത് വൈഡ് സ്ലിപ്പിലേക്ക് പാഞ്ഞു. ഇടതു വശത്തേക്കു ചാടിയ ഗുപ്റ്റില്‍ ഒറ്റക്കൈ ക്യാച്ചിലൂടെ വാര്‍ണറെ ഡഗ് ഔട്ടിലേക്ക് തിരിച്ചയച്ചു.
വാര്‍ണര്‍ നേരത്ത മടങ്ങിയെങ്കിലും മത്സരത്തില്‍ ജയം ഓസീസിനൊപ്പം നിന്നു. മൂന്ന് വിക്കറ്റിനായിരുന്നു കങ്കാരുപ്പട ജയിച്ചത്. ആദ്യം ബാറ്റ് ചെയ്ത കിവികള്‍ ഏഴ് വിക്കറ്റ് നഷ്ടത്തില്‍ 158 റണ്‍സെടുത്തു. ഓസ്‌ട്രേലിയ 19.5 ഓവറില്‍ ഏഴ് വിക്കറ്റ് കളഞ്ഞ് 159 റണ്‍സുമായി വിജയം എത്തിപ്പിടിച്ചു.