ഇന്ത്യന്‍ ഓള്‍റൗണ്ടര്‍ ഹാര്‍ദിക് പാണ്ഡ്യ ഭാര്യ നടാഷ സ്റ്റാന്‍കോവിച്ചുമായുള്ള വേര്‍പിരിയല്‍ സ്ഥിരീകരിച്ചു. ഈ വാര്‍ത്ത ആരാധകരെ ഞെട്ടിച്ചുവെങ്കിലും അവരുടെ വിവാഹമോചനത്തെക്കുറിച്ചുള്ള അഭ്യൂഹങ്ങള്‍ കഴിഞ്ഞ കുറച്ച് മാസങ്ങളായി പ്രചരിക്കുന്നതിനാല്‍ അതിശയിക്കാനില്ല.
നടാഷ തന്റെ വിവാഹ ചിത്രങ്ങളെല്ലാം ഇന്‍സ്റ്റാഗ്രാമില്‍ നിന്ന് നീക്കം ചെയ്യുകയും പാണ്ഡ്യയെ തന്റെ കുടുംബപ്പേരില്‍ നിന്ന് ഒഴിവാക്കുകയും ചെയ്തതോടെ അവരുടെ വേര്‍പിരിയലിനെക്കുറിച്ചുള്ള ഊഹാപോഹങ്ങള്‍ ഉയര്‍ന്നു. ഭാര്യയുടെ ജന്മദിനത്തില്‍ ഹാര്‍ദിക് ആശംസകള്‍ അറിയിക്കാത്തതും ശ്രദ്ധിക്കപ്പെട്ടു.
വിവാഹ മോചനത്തില്‍ നടാഷ ഉന്നയിച്ചിട്ടുള്ള ആവശ്യങ്ങളെക്കുറിച്ചും ഇരുകക്ഷികളും തമ്മിലുള്ള കരാറിനെക്കുറിച്ചും വ്യക്തമായ വിവരങ്ങളൊന്നുമില്ല. അതിനിടെ ഹാര്‍ദിക് തന്റെ 100 കോടി ആസ്തിയുടെ 70 ശതമാനവും നടാഷയ്ക്ക് നല്‍കുമെന്ന് ചില റിപ്പോര്‍ട്ടുകള്‍ അവകാശപ്പെടുന്നു. എന്നാലിത് സാധ്യമല്ല എന്നതാണ് അറിയുന്നത്. കാരണം, 2018 ലെ ഒരു അഭിമുഖത്തില്‍, തന്റെ സ്വത്തിന്റെ 50 ശതമാനം അമ്മയുടെ പേരിലാണ് രജിസ്റ്റര്‍ ചെയ്തിട്ടുള്ളതെന്ന് പാണ്ഡ്യ വെളിപ്പെടുത്തിയിരുന്നു.
ഈ സാഹചര്യത്തില്‍ ഹാര്‍ദിക്കിന് തന്റെ മൊത്തത്തിലുള്ള സ്വത്തിന്റെ വലിയൊരു ഭാഗം നടാഷയ്ക്ക് നല്‍കാനാവില്ല. എന്നിരുന്നാലും, ഇന്ത്യന്‍ നിയമമനുസരിച്ച് നടാഷയ്ക്ക് ഇപ്പോഴും മെയിന്റനന്‍സ് ആവശ്യപ്പെടാം. റിപ്പോര്‍ട്ടുകള്‍ പ്രകാരം, 2024 ലെ കണക്കനുസരിച്ച് താരത്തിന്റെ ആകെ ആസ്തി 91 കോടി രൂപയാണ്.