ഇന്ത്യയും ഓസ്‌ട്രേലിയയും തമ്മിൽ ഈ വര്ഷം നടക്കുന്ന ബോർഡർ ഗാവസ്‌കർ ട്രോഫിയെ ആരാധകർ ആവേശത്തോടെയാണ് നോക്കി കാണുന്നത്. 2024-25 ബോർഡർ-ഗവാസ്കർ ട്രോഫിയിൽ ഇരു ടീമുകളും അഞ്ച് ടെസ്റ്റുകൾ കളിക്കും. ഇന്ത്യൻ ബാറ്റ്‌സ്മാൻ വിരാട് കോഹ്‌ലിയുടെ വിക്കറ്റ് നേടാൻ സാധിക്കുമെന്ന പ്രതീക്ഷ മിച്ചൽ സ്റ്റാർക്ക് പങ്കുവെച്ചു. ഓസ്‌ട്രേലിയൻ മണ്ണിൽ തുടർച്ചയായ മൂന്നാം ടെസ്റ്റ് പരമ്പര വിജയമാണ് ഇന്ത്യ ഇത്തവണ ലക്ഷ്യമിടുന്നത്.
സ്റ്റാർക്ക് പറഞ്ഞത് ഇങ്ങനെയാണ്:
“ഞങ്ങൾ പരസ്പരം ഒരുപാട് ക്രിക്കറ്റ് കളിച്ചിട്ടുള്ളതിനാൽ വിരാട് കോഹ്‌ലിക്ക് എതിരെ ബൗൾ ചെയ്യുന്നത് ഞാൻ ആസ്വദിക്കുന്നു. കളിക്കളത്തിൽ ഞാൻ അവനുമായി നിരവധി തവണ യുദ്ധം ചെയ്തിട്ടുണ്ട്, ഒന്നോ രണ്ടോ തവണ അവനെ പുറത്താക്കിയിട്ടുണ്ട്. എനിക്കെതിരെ കുറച്ച് റൺസും അദ്ദേഹം നേടിയിട്ടുണ്ട്. അതിനാൽ, ഞങ്ങൾ രണ്ടുപേരും മുഖാമുഖം വരുന്നത് ആസ്വദിക്കുന്നു,” മിച്ചൽ സ്റ്റാർക്ക് സ്റ്റാർ സ്പോർട്സിൽ പറഞ്ഞു.
തിരക്കേറിയ ഹോം സീസണിലും ഓസ്‌ട്രേലിയയ്‌ക്കെതിരായ ടെസ്റ്റ് പരമ്പരയിലും വിരാടിനെ കാത്തിരിക്കുന്നത് വമ്പൻ നേട്ടങ്ങളാണ്. ഇന്ത്യ 10 ടെസ്റ്റുകൾ കളിക്കാനിരിക്കെ, സച്ചിൻ ടെണ്ടുൽക്കർ, രാഹുൽ ദ്രാവിഡ്, സുനിൽ ഗവാസ്കർ എന്നിവർക്ക് ശേഷം ഏറ്റവും വിപുലമായ ഫോർമാറ്റിൽ 30 സെഞ്ച്വറി തികയ്ക്കുന്ന നാലാമത്തെ ഇന്ത്യൻ ബാറ്ററായി അദ്ദേഹം മാറും. ഇതുവരെ 29 സെഞ്ചുറികളാണ് കോഹ്‌ലി നേടിയത്.
ടെസ്റ്റ് ക്രിക്കറ്റിൽ 10,000 റൺസ് തികയ്ക്കുന്നതിന് 1152 റൺസ് അകലെയാണ് അദ്ദേഹം. സച്ചിൻ, ദ്രാവിഡ്, ഗവാസ്കർ എന്നിവർക്ക് ശേഷം ഈ നാഴികക്കല്ലിലെത്തുന്ന നാലാമത്തെ ഇന്ത്യക്കാരനാകാൻ ഈ 35കാരന് സാധിക്കും.
400 ടെസ്റ്റ് വിക്കറ്റിന് അടുത്തെത്താൻ സ്റ്റാർക്കിന് അവസരമുണ്ട്. എലൈറ്റ് ഗ്രൂപ്പിൽ ഷെയ്ൻ വോൺ, ഗ്ലെൻ മഗ്രാത്ത്, നഥാൻ ലിയോൺ എന്നിവരോടൊപ്പം ചേരാൻ അദ്ദേഹത്തിന് 42 വിക്കറ്റുകൾ ആവശ്യമാണ്.