ഇന്ത്യൻ ഓപ്പണർ ശിഖർ ധവാൻ അടുത്തിടെ തൻ്റെ പ്രിയപ്പെട്ട ഓപ്പണിംഗ് പങ്കാളിയെ തിരഞ്ഞെടുത്തു. തൻ്റെ അന്താരാഷ്ട്ര കരിയറിൽ താൻ ഏറ്റവും കൂടുതൽ ബാറ്റിംഗ് ഓപ്പണിംഗ് ആസ്വദിച്ച ബാറ്റർ എന്നാണ് ധവാൻ രോഹിത് ശർമ്മയെ വിശേഷിപ്പിച്ചത്.
ശിഖർ ധവാനും രോഹിത് ശർമ്മയും ഒരുമിച്ച് ഒരുപാട് വർഷങ്ങൾ ഇന്ത്യക്കായി ഓപ്പണിങ് ജോഡികൾ ആയി ഒരുപാട് മികച്ച പ്രകടനം നടത്തിയിട്ടുണ്ട്. അവരുടെ ഓപ്പണിംഗ് കോമ്പിനേഷൻ രാജ്യത്തിന് വേണ്ടി കളിച്ചിട്ടുള്ളതിൽ വച്ച് ഏറ്റവും മികച്ച ഒന്നായി കണക്കാക്കപ്പെടുന്നു. 2013ലെ ചാമ്പ്യൻസ് ട്രോഫിയിൽ എംഎസ് ധോണിയുടെ ക്യാപ്റ്റൻസിയിലാണ് ഇരുവരും ഒന്നിച്ച് തുടങ്ങിയത്.
ഇരുവരും 115 ഏകദിനങ്ങളിൽ നിന്ന് 45.55 ശരാശരിയിൽ 5148 റൺസ് ഒരുമിച്ച് നേടിയിട്ടുണ്ട്. ഏകദിന ഫോർമാറ്റിൽ 18 സെഞ്ച്വറി കൂട്ടുകെട്ടുകളും 15 അർദ്ധ സെഞ്ച്വറി കൂട്ടുകെട്ടുകളും അവർ ഒരുമിച്ച് രേഖപ്പെടുത്തിയിട്ടുണ്ട്. ഏകദിന ഫോർമാറ്റിൽ ഇന്ത്യയുടെ ഏറ്റവും മികച്ച നാലാമത്തെ ഓപ്പണിങ് സഖ്യമാണ് ഇരുവരുടെയും.
സ്റ്റാർ സ്‌പോർട്‌സുമായുള്ള ഒരു ചാറ്റിനിടെ, തൻ്റെ പ്രിയപ്പെട്ട ഓപ്പണിംഗ് പങ്കാളിയെക്കുറിച്ച് ധവാനോട് ചോദിച്ചു. രോഹിത് ശർമ്മ തൻ്റെ പ്രിയപ്പെട്ട ഓപ്പണിംഗ് പങ്കാളിയാണെന്ന് പറയാൻ ഇടംകയ്യൻ ഒരു മടിയുമുണ്ടായില്ല. രോഹിത് വളരെക്കാലമായി തൻ്റെ പ്രിയ ഓപ്പണിംഗ് പങ്കാളിയാണെന്നും അദ്ദേഹവുമായി നല്ല ബന്ധം പങ്കിടുന്നുണ്ടെന്നും അദ്ദേഹം കൂട്ടിച്ചേർത്തു.
“8-10 വർഷമായി ഞാൻ രോഹിതിനൊപ്പം ഓപ്പൺ ചെയ്തിട്ടുണ്ട്. രോഹിതുമായി എനിക്ക് ശക്തമായ ബന്ധമുണ്ട്. അവൻ ഒരു രത്നമാണ്. അവനാണ് എന്റെ പ്രിയ ഓപ്പണർ ” ധവാൻ പറഞ്ഞു. “ഞാൻ അദ്ദേഹത്തെ ഒത്തിരി സഹായം ചെയ്തിട്ടുണ്ട്. അവനതൊക്കെ ഇഷ്ടമായിരുന്നു” ധവാൻ ഓർത്തു.
അതേസമയം ധവാനെ സംബന്ധിച്ച് ഇനി ഇന്ത്യൻ ടീമിലേക്കുള്ള മടങ്ങിവരവ് ബുദ്ധിമുട്ടാണ് എന്ന് പറയാം.