ടി20 പരമ്പരയിലെ ആദ്യ മത്സരത്തിൽ ശ്രീലങ്കയെ തകർത്തെറിഞ്ഞ് ഇന്ത്യക്ക് തകർപ്പൻ തുടക്കമാണ് കിട്ടിയത്. 43 റൺസിന്റെ ഗംഭീര ജയമാണ് ഇന്ത്യ കുറിച്ചത്. ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ ഉയർത്തിയ 214 റൺസ് വിജയലക്ഷ്യത്തിനുമുന്നിൽ ബാറ്റുചെയ്ത ലങ്കൻ പോരാട്ടം 170 റൺസിൽ അവസാനിക്കുക ആയിരുന്നു. 48 പന്തിൽ 79 റൺസടിച്ച പാതും നിസങ്കയുടെയും 45 റൺസെടുത്ത കുശാൽ മെൻഡിസിൻറെയും ഓപ്പണിംഗ് കൂട്ടുകെട്ട് ലങ്കയെ വിജയിപ്പിക്കുമെന്ന് തോന്നിച്ചെങ്കിലും പിന്നെ വന്ന ആർക്കും പിടിച്ചുനിൽക്കാൻ പോലും ആയില്ല. ഇന്ത്യക്കായി റിയാൻ പരാഗ് റൺസിന് മൂന്ന് വിക്കറ്റെടുത്തപ്പോൾ അക്സർ പട്ടേലും അർഷ്ദീപ് സിംഗും രണ്ട് വിക്കറ്റ് വീതമെടുത്തു. ആദ്യം ബാറ്റ് ചെയ്ത ഇന്ത്യക്ക് വേണ്ടി 26 പന്തിൽ 58 റൺസെടുത്ത സൂര്യകുമാർ യാദവും21 പന്തിൽ 40 റൺ നേടിയ യശസ്വി ജയ്സ്വാളും ആണ് തിളങ്ങിയത്.
ബാറ്റിംഗിൽ തിളങ്ങാൻ സാധിച്ചില്ലെങ്കിലും റിയാൻ പരാഗിന്റെ ബോളിങ് മികച്ചത് ആയിരുന്നു. തനിക്ക് ബോളിങ്ങും വശം ഉണ്ടെന്ന് തെളിയിച്ച താരം മൂന്ന് വിക്കറ്റുകൾ വീഴ്ത്തി. ഇതിൽ ആദ്യ വിക്കറ്റ് വീഴ്ത്തിയതിന് പിന്നാലെ താരം വലിയ രീതിയിൽ ഉള്ള ആഘോഷമാണ് നടത്തിയത്. ഇത് ആരാധകർ ഏറ്റെടുക്കയും ചെയ്തു.
തന്റെ ആദ്യ മൂന്ന് മത്സരങ്ങളിലും ബോളിങ് അവസരം കിട്ടിയിട്ടും അത് മുതലാക്കാൻ സാധിക്കാതിരുന്ന താരം എന്തായാലും ഇന്നലെ മികവ് കാണിച്ചു. വിക്കറ്റിന് ശേഷം അദ്ദേഹം ആഹ്ലാദഭരിതനായി ഗർജിച്ചു, പ്രത്യേക നിമിഷം ആവേശത്തോടെ ആഘോഷിച്ചു. ബാറ്റിംഗിനിടെ 7 (6) ന് പുറത്തായ ശേഷം റിയാന് ഒരു തിരിച്ചുവരവ് അത്യാവശ്യം ആയിരുന്നു. 1.2-0-5-3 എന്ന മികച്ച കണക്കുകളോടെ അവസാനിച്ച പ്രകടനത്തിൽ തൻ്റെ ബൗളിംഗ് മികവ് കൊണ്ട് എന്തായാലും ബാറ്റിംഗിലെ കുറവ് നികത്താൻ താരത്തിനായി.
പരമ്പരയിലെ രണ്ടാം മത്സരം ഇന്ന് നടക്കും.